اسلام آباد (نیوز ڈ یسک) وفاقی محتسب برائے انسدادِ ہراسیت (فوسپاہ) نے بچے کی پیدائش پر رخصت نہ دینے کے معاملے میں اسٹیٹ بینک کو پانچ لاکھ روپے جرمانہ ادا کرنے کا حکم دے دیا۔
میڈیا رپورٹس کے مطابق محتسب فوزیہ وقار نے قرار دیا کہ متعلقہ بینک افسر کو 30 روز کی پیٹرنٹی چھٹی نہ دینا قانون کے تقاضوں کے خلاف ہے، اسی بنا پر جرمانہ عائد کیا گیا۔ فیصلے کے تحت جرمانے کی رقم میں سے چار لاکھ روپے شکایت کنندہ افسر سید باسط علی کو دیے جائیں گے اور انہیں مکمل تنخواہ کے ساتھ ایک ماہ کی رخصت بھی فراہم کی جائے گی۔محتسب نے اپنے حکم میں اسٹیٹ بینک کو ہدایت کی کہ وہ میٹرنٹی اور پیٹرنٹی رخصت ایکٹ 2023 کے مطابق باقاعدہ پالیسی تشکیل دے۔ ان کا کہنا تھا کہ باپ کو رخصت سے محروم رکھنا صنفی امتیاز کے زمرے میں آتا ہے، کیونکہ بچوں کی پرورش صرف ماں کی ذمہ داری نہیں بلکہ دونوں والدین کی مشترکہ ذمہ داری ہے۔
یاد رہے کہ متعلقہ بینک انتظامیہ نے پہلے مؤقف اختیار کیا تھا کہ چونکہ ادارے میں پیٹرنٹی لیو کی پالیسی موجود نہیں، اس لیے درخواست منظور نہیں کی جا سکتی۔
