مریدکے( این این آئی)مریدکے کی نواحی آبادی بھٹہ کوٹ میں مبینہ طور پر بیوی نے بیٹیوں ،بیٹے اوردیور کے ساتھ مل کر شوہر پر پیٹرول چھڑک کر زندہ جلا دیا ،
پولیس نے مقتول کے بھائی کی رپورٹ پر مقدمہ درج کرکے ملزمان کی تلاش شروع کردی ۔بتایا گیا ہے کہ آبادی بھٹہ کوٹ میں گھر میں معمولی جھگڑے کے بعد مبینہ طو رپر بیوی سکینہ نے اپنی بیٹیوں فائزہ ،خدیجہ ،بیٹے نعمان اور دیور کے ساتھ مل کر شوہر جاوید بٹ پر پیٹرول چھڑک کر آگ لگا دی جسے مریدکے ٹی ایچ کیو ہسپتال سے لاہور جناح ہسپتال منتقل کیا گیا جہاں وہ دم توڑ گیا ۔پولیس نے مقتول جاوید بٹ کے بڑے بھائی رمضان بٹ کی رپورٹ پر سکینہ بی بی ،فائزہ ،خدیجہ ،نعمان اور تین نامعلوم افراد کے خلاف مقدمہ درج کرکے تلاش شروع کردی جبکہ لاش پوسٹ مارٹم کیلئے ٹی ایچ کیو ہسپتال مریدکے منتقل کردی گئی۔
ایس ایچ او تھانہ نارنگ یاسر چیمہ کے مطابق محمد رمضان نامی شخص نے گزشتہ رات انہیں اطلاع دی کہ اس کے بھائی کو اس کی بیوی اوربچوں نے زندہ جلادیا ہے ۔درخواست میں زندہ جلانے کی وجہ نہیں بتائی گئی تاہم تفتیش شروع کردی گئی ہے جلد اصل حقائق سامنے آجائیں گے اور ملزمان بھی گرفتار کرلئے جائیں گے۔
