اسلام آباد (نیوز ڈیسک) پولیس نے ڈرائیور کی اہلیہ کے ساتھ مبینہ زیادتی میں ملوث شخص کو حراست میں لے لیا ہے۔
پولیس ترجمان کے مطابق برکی تھانے کی ٹیم نے ایس پی کینٹ کی ہدایات پر فوری کارروائی کرتے ہوئے ملزم سہیل صادق کو گرفتار کیا۔ ایس ایچ او عمران نواز نے نفری کے ہمراہ چھاپہ مار کر نامزد ملزم کو قابو کیا۔تحقیقات کے مطابق متاثرہ خاتون اور اس کا شوہر ملزم کے گھر ملازمت کرتے تھے۔ خاتون نے تقریباً تین ماہ قبل ملازمت چھوڑ دی تھی، تاہم اس کا شوہر بطور ڈرائیور کام جاری رکھے ہوئے تھا۔ الزام ہے کہ ایک روز ملزم ڈرائیور کے ہمراہ اس کے گھر آیا اور اسے کسی کام کے بہانے باہر بھیج دیا۔ اس دوران ملزم نے خاتون کو زبردستی زیادتی کا نشانہ بنایا۔
پولیس کا کہنا ہے کہ ملزم نے خاتون کو واقعہ ظاہر کرنے کی صورت میں سنگین نتائج کی دھمکیاں بھی دیں۔ متاثرہ خاتون کی درخواست پر سہیل صادق کے خلاف مقدمہ درج کر لیا گیا ہے اور مزید تحقیقات کے لیے کیس جینڈر سیل کے سپرد کر دیا گیا ہے۔
