اسلام آباد (نیوز ڈیسک) کراچی کے علاقے بہادر آباد میں ڈکیتی کی بڑی واردات سامنے آئی ہے جہاں مسلح ملزمان ایک رہائشی مکان سے بھاری مقدار میں سونا اور نقد رقم لوٹ کر فرار ہو گئے۔
پولیس کے مطابق واقعہ گزشتہ روز پیش آیا، جس کا مقدمہ درج کر لیا گیا ہے۔ ایف آئی آر کے مطابق متاثرہ شہری بینک لاکر سے زیورات اور ایک لاکھ امریکی ڈالر نکلوا کر اپنے ڈرائیور کے ہمراہ گھر پہنچا تھا کہ اس دوران ڈاکوؤں نے اس کا پیچھا کیا۔پولیس کا کہنا ہے کہ دو موٹرسائیکلوں پر سوار چار ملزمان گھر تک پہنچے، جن میں سے ایک ملزم باہر نگرانی کرتا رہا جبکہ تین افراد زبردستی گھر میں داخل ہوئے اور واردات انجام دی۔پولیس کے مطابق ملزمان فرار کے دوران اسپیڈ بریکر پر موٹرسائیکل پھسلنے سے گر پڑے، جس کے باعث لوٹا گیا سونا سڑک پر بکھر گیا۔ قریب واقع گھروں کے سیکیورٹی گارڈز کو دیکھ کر ملزمان عجلت میں فرار ہو گئے۔حکام کا کہنا ہے کہ بیشتر زیورات واپس حاصل کر لیے گئے ہیں، تاہم امریکی ڈالر ملزمان اپنے ساتھ لے جانے میں کامیاب ہو گئے۔
پولیس نے فرار ہونے والے ملزمان کے راستوں کا تعین کر لیا ہے، جیو فینسنگ کا عمل جاری ہے جبکہ مختلف مقامات سے سی سی ٹی وی فوٹیجز بھی اکٹھی کر لی گئی ہیں۔
