لاہور (این این آئی)لاہور ہائیکورٹ میں 16سال سے کم عمر بچوں کے سوشل میڈیا کے استعمال پر پابندی کیلئے درخواست دائر کر دی گئی ہے، درخواست آٹھویں جماعت کی طالبہ عالیہ سلیم نے اپنی وکیل شیزا کے توسط سے دائر کی ہے ۔درخواست میں وفاقی حکومت، پاکستان ٹیلی کمیونیکیشن اتھارٹی اور دیگر متعلقہ اداروں کو فریق بناتے ہوئے موقف اپنایا گیا ہے کہ سوشل میڈیا بچوں کی ذہنی، اخلاقی اور تعلیمی نشوونما پر منفی اثرات مرتب کر رہا ہے۔

درخواست گزار کے مطابق کمسن بچوں میں سوشل میڈیا کے بے جا استعمال سے نفسیاتی مسائل پیدا ہو رہے ہیں، جو ان کی شخصیت اور مستقبل پر منفی اثر ڈال سکتے ہیں۔ درخواست میں یہ بھی کہا گیا ہے کہ ریاست کی آئینی ذمہ داری ہے کہ وہ بچوں کے بنیادی حقوق کا تحفظ یقینی بنائے۔