اسلام آباد (نیوز ڈیسک) مری ایکسپریس وے پر مسلسل اور شدید برفباری کے باعث گاڑیوں کی آمد و رفت عارضی طور پر معطل کر دی گئی ہے۔ موٹر وے پولیس کے مطابق فلگراں ٹول پلازہ سے مری کی جانب جانے والی ٹریفک کو روک دیا گیا ہے، تاہم مقامی رہائشیوں اور ہنگامی سروسز کو آمد و رفت کی اجازت دی جا رہی ہے۔
موٹر وے پولیس کا کہنا ہے کہ سڑک کو دوبارہ قابلِ استعمال بنانے کے لیے عملہ برف ہٹانے کے کام میں مصروف ہے۔ دوسری جانب ملک کے مختلف علاقوں میں برفباری کے بعد شہریوں کی بڑی تعداد نے تفریحی مقامات کا رخ کرنا شروع کر دیا ہے۔ادھر مری، گلیات، نتھیا گلی اور ٹھنڈیانی میں موسم سرما کی پہلی برفباری ریکارڈ کی گئی ہے، جبکہ ایبٹ آباد اور اس کے اطراف میں بارش اور برفباری کے باعث سردی کی شدت میں نمایاں اضافہ ہو گیا ہے۔
