چترال (این این آئی )گہریت گول میں روسی شہری نے کشمیری مارخور کا ٹرافی شکار کرلیا، 68 ہزار ڈالر کا لائسنس حاصل کیا تھا۔ضلع چترال کے علاقے گہریت گول میں ایک روسی شہری مسٹر اینڈری زیاکا نے سرکاری اجازت نامے کے تحت نایاب کشمیری مارخور کا شکار کر لیا،شکار کیے گئے مارخور کے سینگوں کی لمبائی 41 انچ بتائی گئی ہے ۔محکمہ وائلڈ لائف کے مطابق غیر ملکی شکاری نے اس شکار کے لیے 68 ہزار امریکی ڈالر کے عوض باقاعدہ لائسنس حاصل کیا تھاشکار کے موقع پر پولیس کی سیکیورٹی، وائلڈ لائف ڈیپارٹمنٹ کے افسران اور وی سی سی (ویلیج کنزرویشن کمیٹی) کے صدور بھی موجود تھے۔

حکام کے مطابق یہ شکار کمیونٹی بیسڈ ٹرافی ہنٹنگ پروگرام کے تحت کیا گیا،جس سے حاصل ہونے والی آمدن کا بڑا حصہ مقامی کمیونٹی کی فلاح و بہبود اور جنگلی حیات کے تحفظ پر خرچ کیا جائیگا۔وائلڈ لائف حکام کے مطابق ٹرافی ہنٹنگ پروگرام کا مقصد نایاب نسل کے جانوروں کے تحفظ کے ساتھ ساتھ مقامی آبادی کو معاشی فوائد فراہم کرنا ہے۔