اسلام آباد (نیوز ڈیسک)پاکستان پیپلزپارٹی کے چیئرمین بلاول بھٹو زرداری کا کہنا ہے کہ بھارت مئی میں ہونے والی شکست کو اب تک تسلیم نہیں کر سکا اور وزیرِاعظم نریندر مودی ہمارے فیلڈ مارشل کا نام سن کر بھی گھبرا جاتا ہے۔گڑھی خدا بخش میں شہید محترمہ بے نظیر بھٹو کی 18ویں برسی کے موقع پر منعقدہ جلسے سے خطاب کرتے ہوئے بلاول بھٹو زرداری نے کہا کہ گزشتہ ایک سال کی سب سے بڑی کامیابی یہ رہی کہ افواجِ پاکستان اور پوری قوم نے مل کر بھارت کو میدانِ جنگ میں ناکامی سے دوچار کیا۔

انہوں نے کہا کہ اس معرکے میں حاصل ہونے والی کامیابی صرف کسی ایک ادارے کی نہیں بلکہ پورے پاکستان کی فتح ہے، جس کے بعد عالمی سطح پر ملک کے مؤقف کو پذیرائی ملی۔ بلاول بھٹو نے مزید کہا کہ یہ کامیابی گڑھی خدا بخش کی عظیم قربانیوں کے بغیر ممکن نہ تھی، کیونکہ انہی قربانیوں کے نتیجے میں پاکستان ایک مضبوط اور ایٹمی قوت بن کر ابھرا۔