اسلام آباد (نیوز ڈیسک)اسلام آباد اور اس کے مضافات میں ایک مرتبہ پھر زلزلے کے جھٹکے محسوس کیے گئے، جس کے باعث شہری گھبرا کر گھروں سے باہر نکل آئے۔تفصیلات کے مطابق وفاقی دارالحکومت اور قریبی علاقوں میں آنے والے زلزلے کی شدت ریکٹر اسکیل پر 5.7 ریکارڈ کی گئی۔ جھٹکے محسوس ہوتے ہی لوگ خوف کے عالم میں کلمہ طیبہ کا ورد کرتے ہوئے کھلے مقامات کی جانب دوڑ پڑے۔محکمہ موسمیات (PMD) کے مطابق زلزلے کی گہرائی 12 کلو میٹر تھی، جبکہ اس کا مرکز افغانستان کے ہندوکش پہاڑی سلسلے میں واقع تھا۔

زلزلہ 19 دسمبر 2025 کی صبح 10 بج کر 39 منٹ پر آیا۔ جھٹکے چترال اور دیر کے علاقوں میں بھی رپورٹ ہوئے۔اس سے کچھ عرصہ قبل اکتوبر میں بھی راولپنڈی، اسلام آباد، چترال، سوات اور پشاور سمیت خیبر پختونخوا کے مختلف علاقوں میں ہلکے اور درمیانے درجے کے زلزلے محسوس کیے گئے تھے۔ گلگت اور ایبٹ آباد کے گرد و نواح میں بھی اسی طرح کے جھٹکے ریکارڈ کیے گئے تھے۔زلزلہ پیما مرکز کا کہنا تھا کہ اس پچھلے زلزلے کی شدت 5.6 تھی جبکہ گہرائی تقریباً 120 کلو میٹر ریکارڈ کی گئی تھی۔ اس کا مرکز بھی ہندوکش ریجن، افغانستان میں ہی واقع تھا۔