لاہور( این این آئی)لاہور کے علاقے نواب ٹائون میں ناروے سے آئے شہری سے گن پوائنٹ پر لاکھوں روپے لوٹنے والے ڈکیت پولیس کے ہی اہلکار نکلے جنہیں گرفتار کر لیا گیامتاثرہ شہری مسعود الحق کے مطابق 11دسمبر کی شام یونیورسٹی آف لاہور کے پارکنگ گیٹ کے سامنے 2باوردی پولیس اہلکاروں نے اسے روکا۔
مدعی کے مطابق اہلکار اسے موٹر سائیکل پر بٹھا کر نرسری کے قریب ایک ویران مقام پر لے گئے اور خود کو سی سی ڈی کا اہلکار ظاہر کرکے ان کائونٹر کی دھمکیاں دیں،ملزمان نے پسٹل کے زور پر مسعود الحق کے بینک کارڈز حاصل کیے جن میں سے ایک اہلکار نے قریبی اے ٹی ایم سے 95ہزار روپے نکلوا لیے۔مزید برآں پولیس اہلکاروں نے مدعی کا موبائل فون لے کر اس کے بینک اکائونٹ سے 5لاکھ روپے بھی اپنے اکائونٹ میں منتقل کر لیے۔واقعہ کی درخواست پر پولیس نے مقدمہ درج کر کے دونوں ملزمان کو گرفتار کر لیا، گرفتار ہونے والوں میں یاسرفلائنگ اسکواڈ میں اہلکار جبکہ وقار ایس پی یو میں تعینات ہے۔
