اسلام آباد (نیوز ڈیسک) لیاقتآباد میں 11 سالہ کم سن بچی کو ہراساں کرنے والے وین ڈرائیور کو پولیس نے کارروائی کرتے ہوئے حراست میں لے لیا۔
ایس ایچ او لیاقتآباد اور ان کی ٹیم نے علاقے کے بازار میں تلاش کے بعد مشتبہ شخص کو گرفتار کیا۔ اس کیس کے لیے ڈی آئی جی آپریشنز نے اے ایس پی ماڈل ٹاؤن کشمالہ فاروق کو خصوصی ذمہ داری سونپی تھی۔
اے ایس پی کشمالہ فاروق نے بتایا کہ متاثرہ بچی اسکول سے وین کے ذریعے گھر واپس آ رہی تھی کہ دورانِ سفر ملزم نے اسے تنگ کرنا اور چھیڑ چھاڑ شروع کر دی۔ بچی کے شور مچانے پر ڈرائیور موقع سے بھاگ نکلا تھا تاہم بعد میں اسے ٹریس کر کے پکڑ لیا گیا۔
بروقت کارروائی پر ایس پی شہربانو نقوی نے ایس ایچ او محسن شہزاد اور ان کی ٹیم کی کارکردگی کو سراہا۔ اے ایس پی کے مطابق گرفتار وین ڈرائیور حنیف کے خلاف مقدمہ درج کرکے اسے جینڈر سیل کے حوالے کر دیا گیا ہے۔
ایس پی ماڈل ٹاؤن شہربانو نقوی کا کہنا تھا کہ بچوں کے خلاف ہراسگی کے واقعات کسی صورت برداشت نہیں کیے جائیں گے اور ایسے عناصر کے لیے زیرو ٹالرینس پالیسی برقرار رہے گی۔
