واشنگٹن(این این آئی)امریکی عالمی جریدے کے لکھاری ستھرا پنجاب پروگرام کے معترف نکلے،مریم نواز اور ستھرا پنجاب کی ٹیم کو کامیابی کا کریڈٹ دیدیا۔امریکی عالمی جریدے ”فوربز” میں ستھرا پنجاب پروگرام کامیابی کی باز گشت چل نکلی۔ بیسٹ سیلنگ رائٹر و کالمسٹ ”پال کلین” ستھرا پنجاب پروگرام کے معترف نکلے۔ انہوں نے اپنی تحقیقاتی تحریر میں وزیراعلیٰ پنجاب مریم نواز اور ستھرا پنجاب کی ٹیم کو کامیابی کا کریڈٹ دیا۔
رپورٹ میں کہا گیا کہ حکومت پنجاب نے قلیل مدت میں صوبے کے سب سے بڑے چیلنج کو ایک بڑے موقع میں بدل چکی ہے،8 ماہ کی قلیل مدت میں 13 کروڑ لوگوں کے لیے صفائی کا منصوبہ بنانا اور چلانا حیران کن ہے۔کہا گیا کہ موجودہ حکومت سے پہلے پنجاب کے 7 کروڑ لوگ۔ 25 ہزار چھوٹے شہر اور گائوں صفائی جیسی بنیادی سہولت سے محروم تھے۔ 30 ہزار گاڑیوں ایک لاکھ 50 ہزار ورک فورس کی ایک ڈیش بورڈ پر مانیٹرنگ دنیا کے لیے قابل تقلید ہے۔فوربز رپورٹ میں کہا گیا کہ ستھرا پنجاب کا تمام تر آپریشن اور پیمنٹس کا تمام نظام ڈیجیٹل ڈیش بورڈز سے مانیٹر کیا جا رہا ہے اور ستھرا پنجاب پروگرام دنیا میں پرائیویٹ پبلک پارٹنر شپ اور سروس ڈلیوری کا سب سے بڑا منصوبہ بن کر سامنے آیا ہے۔رپورٹ میں کہا گیا کہ دوسرے مرحلے میں ویسٹ ٹو ویلیو۔ اور ویسٹ ٹو انرجی، کاربن کریڈٹس کے منصوبوں پر کام شروع کیا جا چکا ہے اور ستھرا پنجاب لوگوں کے لیے روزگار کے مواقع، ماحول اور پبلک ہیلتھ میں بہتری، اور پرائیویٹ کمپنیز کو بزنس کے نئے مواقع فراہم کر رہا ہے۔کہا گیا کہ ستھرا پنجاب پروگرام کی کامیابی پولیٹیکل لیڈرشپ کے ویڑن اور افسران کی انتھک محنت کا منہ بولتا ثبوت ہے۔
