اسلا م آباد (نیوز ڈیسک) ریس کورس پولیس نے فوری کارروائی کرتے ہوئے 14 سالہ طالبہ کے اغوا کا معمہ حل کر لیا اور لڑکی کو چونگی امرسدھو کے علاقے سے باحفاظت برآمد کرلیا۔پولیس کے مطابق والدین کی شکایت موصول ہوتے ہی معاملے کی حساسیت کو دیکھتے ہوئے فوراً ٹیم تشکیل دی گئی، جس نے جدید ٹیکنالوجی اور موصولہ شواہد کی بنیاد پر مشتبہ شخص کا سراغ لگا لیا۔ کارروائی کے دوران ملزم کو بھی اسی علاقے سے گرفتار کر لیا گیا۔ایس پی سول لائنز چوہدری اثر علی کے مطابق کمسن حجاب تین روز قبل اسکول جاتے ہوئے لاپتا ہوئی تھی۔
سی سی ٹی وی فوٹیج میں بچی کے اسکول کی طرف جاتے ہوئے مناظر نے تفتیش میں اہم کردار ادا کیا۔پولیس نے بتایا کہ ملزم نے بچی کو بہلا پھسلا کر چونگی امرسدھو کے ایک کرائے کے کمرے میں رکھا ہوا تھا۔ چھاپے کے دوران لڑکی کو محفوظ حالت میں بازیاب کر لیا گیا، جبکہ ملزم کے خلاف مقدمہ درج کرکے مزید قانونی کارروائی جاری ہے۔
