اسلام آباد (نیوز ڈیسک)وزیر ریلوے حنیف عباسی نے پی ٹی آئی کو سخت تنبیہ کرتے ہوئے کہا ہے کہ اگر اُن کا رویہ تبدیل نہ ہوا تو حالات ایسے نہ ہوں کہ ان کے قائد کے بارے میں قبل از وقت فیصلے کر لیے جائیں۔قومی اسمبلی میں خطاب کے دوران حنیف عباسی نے چیف آف ڈیفنس سٹاف فیلڈ مارشل عاصم منیر کی قیادت کو سراہا اور کہا کہ گزشتہ 78 سال میں ملک کو جو عزت اور مقام حاصل ہوا ہے، وہ بے مثال ہے۔ اُن کا کہنا تھا کہ قومی مفادات ہر چیز پر فوقیت رکھتے ہیں اور پاکستان کے خلاف سرگرم عناصر کو کسی صورت برداشت نہیں کیا جائے گا۔وزیر ریلوے نے یاد دلایا کہ پاکستان نے افغان مہاجرین کی مہمان نوازی برسوں تک کی، مگر جو قوتیں ملک کے خلاف تھیں، اُن کے ساتھ کوئی نرمی نہیں برتی جائے گی۔
انہوں نے کہا کہ اختلافات کے باوجود قوم نے کبھی بھی ملک کے خلاف سوچا نہیں اور بعض حلقوں کی خبردار کرنے کے باوجود دہشت گرد حملے رکے نہیں۔ حنیف عباسی نے واضح کیا: “ہم اپنے شہریوں کے تحفظ کو مقدم رکھیں گے، دہشت گردوں کا تعاقب کر کے انہیں ختم کریں گے۔”سہیل آفریدی کے حوالے سے بات کرتے ہوئے وزیر نے کہا کہ خیبر پختونخواہ کے وزیراعلیٰ پر جو الزامات لگائے جا رہے ہیں، ان کے متعلق جذباتی فیصلے سے گریز کرنا چاہیے۔ اُن کا مشورہ تھا کہ غیر سنجیدہ بیانات دینے سے پہلے سوچا جائے کہ ملک کو کیا فائدہ ہے۔تحریک انصاف کے بارے میں انہوں نے تنقید کی کہ پارٹی کے ساتھ شامل ہونے والوں کا معاملہ اُن کے لیے نقصان کا باعث بنا ہے اور کئی رہنماؤں کے سیاسی مستقبل متاثر ہوئے ہیں۔ حنیف عباسی نے خبردار کیا کہ اگر پی ٹی آئی اپنا لہجہ نرم نہ کرے تو نتائج سنگین ہو سکتے ہیں، اور یہ بھی کہا کہ ان کے لیڈر کے بارے میں قبل از وقت فیصلہ ہونے جیسی صورت حال پیدا نہ ہو۔
