اسلام آباد (این این آئی) محکمہ موسمیات نے رواں سال پاکستان میں شدید ترین سردی پڑنے بارے سوشل میڈیا پر گردش کرنیوالی خبروں کی سختی سے تردید کر دی ۔ترجمان محکمہ موسمیات کے مطابق ایسی تمام خبریں حقائق کے بالکل منافی ہیں اور ان کی کوئی سائنسی بنیاد نہیں۔
ترجمان نے کہا کہ رواں برس سردیوں میں معمول سے کم بارش ہونے کا امکان ہے، جبکہ سردی کے ریکارڈ ٹوٹنے کے کوئی آثار نہیں ہیں۔محکمہ موسمیات کے مطابق رواں سال موسم سرما میں معمول کے مطابق سردی پڑنے کا امکان ہے۔ترجمان نے عوام سے اپیل کی کہ وہ افواہوں پر کان نہ دھریں اور درست معلومات کیلئے محکمہ موسمیات کی ویب سائٹ سے موسم کی صورتحال سے باخبر رہیں۔
