راولپنڈی (این این آئی)راولپنڈی کی انسداد دہشت گردی عدالت نے علیمہ خان سمیت 10ملزمان کے خلاف 26 نومبر کے احتجاج سے متعلق کیس میں حکم عدولی پر ایس ایچ او اور اے ایس آئی صادق آباد کو گرفتار کرنے کا حکم جاری کر دیا۔
اے ٹی سی راولپنڈی کے جج امجد علی شاہ نے 26 نومبر سے متلعق احتجاج کے کیس میں چالان کے سمن کی تعمیل نہ کرانے پر ایس ایچ او تھانہ صادق آباد ندیم عباس اور اسسٹنٹ سب انسپکٹر شکیل کی گرفتاری کا حکم دیا۔عدالت نے احکامات کی تعمیل نہ کرنے پر ایس ایچ او اور اے ایس آئی کو صادق آباد 6، 6 ماہ قید کی سزا سناتے ہوئے 50، 50 ہزار روپے جرمانہ بھی عائد کیا۔یاد رہے کہ علیمہ خان سمیت 10 ملزمان کے خلاف 26 نومبر کے احتجاج سے متعلق کیس میں عدالت نے ایس پی راول، ایس ایچ او صادق آباد اور اے ایس آئی کے خلاف توہین عدالت کا شوکاز جاری کیا تھا۔عدالت نے پولیس افسران کی جانب سے توہین عدالت کے شوکاز کا جواب غیر تسلی بخش قرار دیا تھا۔
