اسلام آباد(این این آئی)اسلام آباد کے شہریوں کی سہولت کیلئے اہم فیصلہ کرلیا گیا ، آئی جی اسلام آباد نے لائسنس بنوانے کی ڈیڈ لائن میں 7روز کی توسیع کردی۔اسلام آباد پولیس کے ترجمان کے مطابق آئی جی اسلام آباد نے شہریوں کی سہولت کے لیے ڈرائیونگ لائسنس بنوانے کی ڈیڈ لائن میں 7دن کی توسیع کر دی ہے، اب شہری 7اکتوبر 2025تک اپنا لائسنس بنوا سکیں گے۔

ترجمان نے کہا کہ 8اکتوبر سے بغیر ڈرائیونگ لائسنس سڑک پر گاڑی لانے والوں کے خلاف سخت کارروائی کی جائے گی، یہ فیصلہ شہریوں کو زیادہ سے زیادہ سہولت فراہم کرنے کے پیش نظر کیا گیا ہے۔اسلام آباد پولیس نے شہریوں سے اپیل کی ہے کہ وہ مقررہ تاریخ تک لازمی طور پر اپنا ڈرائیونگ لائسنس بنوائیں،اس مقصد کے لیے شہر بھر میں سہولت ڈیسک قائم کیے گئے ہیں تاکہ عوام کو کسی پریشانی کا سامنا نہ ہو۔