اسلام آباد (این ای آئی)محکمہ موسمیات نے ملک بھر میں 29 اگست تا 2 ستمبر کے دوران بارش کی پیشگوئی کرتے ہوئے کہا ہے کہ شدید بارشوں کے باعث پہاڑی علاقوں میں لینڈ سلائیڈنگ کا خطرہ ہے۔جاری اعلامیے کے مطابق 29 اگست تا 2 ستمبر ملک کے بالائی اور وسطی علاقوں میں بارش کا امکان ہے، شدید بارشوں کے باعث پہاڑی علاقوں میں لینڈ سلائیڈنگ کا خطرہ ہے۔
محکمہ موسمیات کے اعلامیے کے مطابق 29 اگست تا 2 ستمبر کشمیر کے مختلف علاقوں میں اور 30 تا 2 ستمبر گلگت بلتستان میں گرج چمک کے ساتھ بارش متوقع ہے۔اعلامیے کے مطابق 29 اگست تا یکم ستمبر خیبر پختونخوا کے مختلف حصوں چترال، دیر، سوات، کوہستان، مانسہرہ، ایبٹ آباد، نوشہرہ، کوہاٹ، کرک، پشاور، چارسدہ، مردان، صوابی، بنوں، لکی مروت، وزیرستان، ڈی آئی خان میں بارشیں متوقع ہیں۔محکمہ موسمیات کے اعلامیے کے مطابق 29 اگست تا 2 ستمبر اسلام آباد، راولپنڈی، مری، گلیات، گوجرانوالہ، لاہور، فیصل آباد، سیالکوٹ، نارووال، خوشاب، سرگودھا سمیت دیگر علاقوں میں بارش ہوسکتی ہے۔موسلادھار بارشوں سے پنجاب اور خیبر پختونخوا کے مختلف علاقوں کے ندی نالوں میں طغیانی کا خدشہ ہے جبکہ اسلام آباد کے نشیبی علاقے زیر آب آسکتے ہیں۔اعلامیے کے مطابق 30 سے 31 اگست کے دوران سندھ میں مختلف علاقوں میں بارش ہوسکتی ہے، جن میں مٹھی، تھر پارکر، سکھر، لاڑکانہ، جیکب آباد، دادو اور عمر کوٹ شامل ہیں۔محکمہ موسمیات کے اعلامیے کے مطابق 30 اگست سے 1 ستمبر کے دوران بلوچستان کے مختلف حصوں بارکھان، موسیٰ خیل، لورالائی، سبی، ڑوب، قلات، خصدار میں بارشیں متوقع ہیں۔
