لاہور (این این آئی) تھانہ ہیئر کے علاقے میں ملزم نے جیل میں 2سال کی سزا کاٹنے کے بعد اپنی بیوی، بیٹی اور سسر سمیت 4افراد کو چھری کے وار سے قتل کر دیا،ملزم نے تمام افراد کو چھری کے وار کرکے قتل کیا اور فرار ہو گیا ، چھوٹے بیٹے نے بھاگ کر اپنی جان بچائی۔پولیس کے مطابق ملزم عمران ایک مقدمہ میں دو سال جیل رہ کر آیا تھا جس کی رنجش پر حملہ کیا، سفاک ملزم نے اپنی بیوی، بیٹی، بھتیجے اور سسر کو چھریوں کے پے در پے وار کر کے موت کے گھاٹ اتار دیا۔پولیس کے مطابق قتل کی لرزہ خیز واردات رات گئے پیش آئی، جہاں ملزم عمران نے انتہائی بے دردی سے چار افراد کو قتل کر دیا۔

مقتولین میں بیوی فوزیہ، بیٹی زینب، سسر مرزا اور بھتیجا شامل ہیں۔پولیس کا کہنا ہے کہ قاتل نے چھوٹی بیٹی پر بھی حملہ کیا، جو زخمی حالت میں ہسپتال منتقل کر دی گئی ہے۔ اس دل دہلا دینے والے واقعے میں چھوٹا بیٹا بھاگ کر جان بچانے میں کامیاب ہو گیا۔ذرائع کے مطابق ملزم عمران واردات کے بعد موقع سے فرار ہو گیا، جس کی گرفتاری کے لیے پولیس کی ٹیمیں تشکیل دے دی گئی ہیں اور مختلف مقامات پر چھاپے مارے جا رہے ہیں۔چار افراد کے قتل کا مقدمہ درج کر لیا گیا۔قتل کا مقدمہ مقتولہ فوزیہ کے بھائی محمد ندیم کے بیان پر درج کیا گیا۔ایس پی کینٹ ڈویژن کے مطابق ملزم کی گرفتاری کے لیے ٹیم تشکیل دے دی گئی۔ ڈی آئی جی آپریشنز لاہور کا کہنا ہے کہ ملزم جلد گرفتار کر لیا جائے گا۔