اسلام آباد (نیوز ڈیسک)لاہور کے علاقے سبزہ زار میں افسوسناک واقعہ پیش آیا جہاں ایک خاتون کے مبینہ دوست نے اس کے بچوں کو نشہ آور گولیاں دے دیں۔ واقعے کے نتیجے میں 11 سالہ ایان جاں بحق ہوگیا جبکہ اس کے دو بہن بھائیوں کی حالت تشویشناک ہے۔پولیس کے مطابق ملزم ریحان کو گرفتار کرلیا گیا ہے، جس نے ابتدائی تفتیش میں اعتراف کیا کہ اس نے بچوں کو نشہ آور گولیاں کھلائیں۔ ملزم کے قبضے سے مزید گولیاں بھی برآمد کرلی گئی ہیں اور اس کے خلاف مقدمہ درج کر لیا گیا ہے۔

ایس پی اقبال ٹاؤن ڈاکٹر عمر نے بتایا کہ دو روز قبل بچوں کی والدہ کام پر گئی تھیں، اسی دوران ریحان گھر میں داخل ہوا اور تینوں بچوں کو زیادہ مقدار میں گولیاں کھلا دیں۔ متاثرہ بچوں کو ماموں اور نانی نے اسپتال منتقل کیا، مگر ایان جانبر نہ ہو سکا۔پولیس کے مطابق بچوں کے والد آٹھ سال قبل وفات پا چکے تھے، جبکہ ملزم ریحان کا بچوں کی والدہ سے ڈھائی سال سے مبینہ تعلق تھا۔