اسلام آباد (نیوز ڈیسک) محکمہ موسمیات کے ڈپٹی ڈائریکٹر عرفان ورک کے مطابق حالیہ بارشوں کا سلسلہ آئندہ دو دنوں تک جاری رہے گا، جب کہ اگست کے مہینے میں بھی معمول سے زیادہ بارشوں کی توقع ظاہر کی گئی ہے۔عرفان ورک نے بتایا کہ جولائی میں ملک بھر میں مجموعی طور پر 25 فیصد زائد بارشیں ریکارڈ کی گئیں، تاہم صوبہ سندھ میں دیگر علاقوں کے مقابلے میں کم بارش ہوئی۔ اگست کے دوران ملک میں عمومی یا زائد بارشیں ہونے کا قوی امکان ہے۔ادھر نیشنل ڈیزاسٹر مینجمنٹ اتھارٹی (این ڈی ایم اے) کی تازہ رپورٹ کے مطابق، مون سون کے باعث پیش آنے والے مختلف حادثات میں جاں بحق افراد کی تعداد 281 تک پہنچ چکی ہے، جب کہ صرف گزشتہ 24 گھنٹوں میں مزید دو افراد زندگی کی بازی ہار گئے۔
این ڈی ایم اے کے ترجمان کا کہنا ہے کہ 26 جون سے شروع ہونے والے مون سون سیزن کے دوران مختلف علاقوں میں 675 افراد زخمی ہو چکے ہیں۔ مسلسل بارشوں کے پیش نظر سیلاب کا خطرہ بھی بڑھ گیا ہے، جس کے باعث الرٹ جاری کر دیا گیا ہے۔نیشنل ایمرجنسی آپریشن سینٹر نے گلگت بلتستان اور آزاد کشمیر کے بعض علاقوں میں بارشوں کے باعث ممکنہ سیلابی صورتِ حال کے خدشے پر وارننگ جاری کی ہے۔ گلگت، سکردو، ہنزہ اور شگر میں 28 سے 31 جولائی تک بارش کا امکان ظاہر کیا گیا ہے، جب کہ مظفرآباد، وادی نیلم اور باغ میں بھی 31 جولائی تک بارشیں متوقع ہیں۔محکمہ موسمیات اور ایمرجنسی سینٹرز نے خبردار کیا ہے کہ ان بارشوں کے نتیجے میں ندی نالوں میں طغیانی آ سکتی ہے، جب کہ شہری علاقوں میں پانی جمع ہونے اور ممکنہ سیلاب کی کیفیت بھی پیدا ہو سکتی ہے۔
