اسلام آباد (نیوز ڈیسک) سابق قومی سلامتی کے مشیر لیفٹیننٹ جنرل (ر) ناصر جنجوعہ نے بھارتی ڈرونز کی سرگرمیوں کے پس منظر میں اہم حقائق سے پردہ اٹھایا ہے۔ انہوں نے بتایا کہ بھارت کی جانب سے بھیجے گئے ڈرونز درحقیقت پاکستان کی اہم عسکری تنصیبات کا پتہ لگانے کی کوشش کرتے ہیں۔
روزنامہ “جنگ” کی رپورٹ کے مطابق جنرل (ر) ناصر جنجوعہ کا کہنا ہے کہ بھارتی حکمتِ عملی یہ ہے کہ پاکستان اپنے فضائی اثاثوں کو ان ڈرونز کے خلاف استعمال کرے تاکہ وہ دفاعی ردعمل کو بھی جانچ سکیں۔ انہوں نے مزید کہا کہ بھارت کو ہرگز یہ آزادی نہیں دی جا سکتی کہ وہ پاکستانی سرزمین پر اپنی مرضی کی کارروائیاں کرے۔
ان کا کہنا تھا کہ بھارت نے حالیہ جارحیت کے ذریعے نہ صرف عسکری اہداف کو بلکہ عام شہریوں اور معصوم بچوں کو بھی نشانہ بنایا، جو ہرگز برداشت نہیں کیا جا سکتا۔ جنرل (ر) جنجوعہ نے زور دے کر کہا کہ پاکستان اس جارحیت کا بھرپور جواب دے گا، مگر وقت، طریقہ اور جگہ کا انتخاب خود کرے گا۔
انہوں نے مزید کہا کہ بھارت دنیا کو گمراہ کر کے اپنے اقدامات کو دہشت گردی کے خلاف کارروائیاں ظاہر کرتا ہے، جبکہ درحقیقت وہ معصوم پاکستانیوں کو نشانہ بنا رہا ہے۔ انہوں نے کہا کہ پاکستان نے ہمیشہ امن کا پیغام دیا ہے اور بھارت کو یہ سمجھانے کی کوشش کی ہے کہ جنگ دونوں ممالک کے لیے تباہ کن ثابت ہو سکتی ہے، مگر بھارت نے اس بات کو نظر انداز کیا۔
سابق مشیر کے مطابق بھارتی طیارے مار گرائے جانے کی تصدیق بین الاقوامی کمپنیوں کی جانب سے بھی ہو چکی ہے، جو اس بات کا ثبوت ہے کہ پاکستان کی دفاعی قوت مکمل طور پر فعال اور مؤثر ہے۔
