لاہور ( این این آئی) وزیر اطلاعات پنجاب عظمیٰ بخاری نے کہا ہے کہ وزیراعظم شہباز شریف جلد ہی ایک اور بڑی خوشخبری کا اعلان کرنے والے ہیں، اب پاکستان میں خوشخبریوں کا موسم شروع ہوگیا ہے، بجلی کی قیمتوں میں کمی پر وزیراعظم اور ان کی ٹیم مبارکباد کے مستحق ہیں،جن کے آئی پی پیز اور بجلی کمپنیوں سے مفادات جڑے تھے، وہ عوامی ریلیف کو برداشت نہیں کر پا رہے،کے پی کے میں کرپشن کے قصے زبان زد عام ہیں، گنڈا پور کی جانب سے پارٹی پر 75کروڑ روپے خرچ کرنے کا بیان قابل تشویش ہے، گنڈا پور کی وزارتِ اعلی خطرے میں، اسے اپنی جماعت کے لوگ کرپٹ قرار دے رہے ہیں،پانی کے معاملے پر جلسوں میں نہیں بلکہ بیٹھ کر بات ہونا چاہیے۔
ان خیالات کا اظہار انہوں نے ڈی جی پی آر میں پریس کانفرنس کرتے ہوئے کیا ۔ وزیر اطلاعات عظمیٰ بخاری نے حکومت کی جانب سے دیے گئے عوامی ریلیف، معاشی استحکام اور حکومتی اقدامات پر تفصیلی روشنی ڈالی۔ انہوں نے کہا کہ عید الفطر کے بعد وزیراعظم شہباز شریف نے بجلی کی قیمتوں میں کمی کا اعلان کیا جس سے گرمیوں کے موسم میں عوام کو بڑا ریلیف حاصل ہوگا ،یہ ریلیف ایک مشکل مرحلے کے بعد ممکن ہوا کیونکہ آئی ایم ایف کو منانا آسان نہیں تھا،حکومت نے آئی ایم ایف کو بھی قائل کر کے ایک بڑا کارنامہ انجام دیا ہے۔ انہوں نے خوشخبری دی کہ جلد وزیراعظم ایک اور بڑی خوشخبری کا اعلان کرنے والے ہیں۔
صوبائی وزیر نے مخالفین کو تنقید کا نشانہ بناتے ہوئے کہا کہ جن کے آئی پی پیز اور بجلی کمپنیوں سے مفادات جڑے تھے، وہ اب عوامی ریلیف کو برداشت نہیں کر پا رہے۔انہوں نے کہا کہ پنجاب حکومت کی جانب سے وزیر اعظم شہباز شریف کا شکریہ ادا کیا گیا ہے کہ بجلی کے بلوں میں تیزی سے ہونے والے اضافے کو روکا گیا۔ عظمی بخاری نے کہا کہ شہباز شریف نے ملک کی معیشت کو سنبھالا اور سری لنکا جیسے حالات پیدا کرنے کی سازشوں کو ناکام بنایا۔ پنجاب حکومت کی کارکردگی پر بات کرتے ہوئے انہوں نے بتایا کہ رمضان سہولت بازاروں میں عوام کو 1.11ارب روپے کی بچت فراہم کی گئی، جہاں 3.57ارب روپے کی خریداری ہوئی۔ 28ہزار شہریوں نے سہولت بازار سے 3کروڑ روپے کا سامان فری ہوم ڈیلیوری کے ذریعے حاصل کیا۔ اگست تک 13نئے سہولت بازار قائم کیے جائیں گے اور 69کروڑ روپے کی لاگت سے موجودہ بازاروں کو سولر انرجی پر منتقل کیا جائے گا۔انہوں نے کہا کہ مریم نواز جہاں عوامی مفاد دیکھیں گی، وہیں منصوبے شروع کیے جائیں گے۔
”سہولت آن دی گو”کے پائلٹ پروگرام کے تحت 14مقامات پر موبائل سہولت مراکز قائم کیے جا رہے ہیں۔ اسی طرح صفائی، ادویات کی دستیابی اور ملازمتوں کی فراہمی پر بھی حکومت سرگرم ہے۔عظمی بخاری کا کہنا تھا کہ ایک ارب روپے کی لاگت سے ایک لاکھ افراد کو ملازمتیں دی گئیں جب کہ عید پر صفائی کا مربوط نظام لاگو کیا گیا۔ادویات کی دستیابی کے حوالے سے عظمی بخاری نے کہا کہ اب تمام ادویات مارکیٹ میں ڈسپلے پر دستیاب ہوں گی، اور اس حوالے سے شکایات کے لیے وزیر اعلی کا خصوصی ڈیسک قائم کیا گیا ہے۔خیبر پختونخوا حکومت پر تنقید کرتے ہوئے انہوں نے کہا کہ وہاں کرپشن کے قصے زبان زد عام ہیں۔ گنڈا پور کی جانب سے پارٹی پر 75کروڑ روپے خرچ کرنے کا بیان قابل تشویش ہے۔انہوں نے اپنی بات جاری رکھتے ہوئے کہا کہ کے پی کے میں صحت، تعلیم اور انفراسٹرکچر کی صورت حال بدتر ہے اور ہینڈ گلوز جیسے بنیادی سامان کی خریداری پر بھی کرپشن کے شواہد موجود ہیں۔ گندم کی خریداری، مساجد کے نام پر رقوم کی بندر بانٹ اور پنشن فنڈز کے غلط استعمال کے الزامات پر بھی عظمی بخاری نے سوالات اٹھائے۔انہوں نے کہا کہ گنڈا پور کی وزارتِ اعلی خطرے میں ہے، اسے اپنی ہی جماعت کے لوگ کرپٹ قرار دے رہے ہیں۔
کے پی میں کرپشن کی کہانیاں ہر زبان پر ہیں، مگر اس معاملے پر نام نہاد یوٹیوبرز اور میڈیا خاموش ہیں۔کے پی میں نہ تو انفراسٹرکچر بنا اورنہ ہی ادویات فراہم ہوئیں جبکہ چترال کے جنگلات میں 866 کروڑ روپے کا قومی نقصان ہوا۔کے پی میں ہسپتالوں،مساجد اور گندم کی خریداری کے نام پر اربوں روپے ٹائیگر فورس میں تقسیم کئے گئے ہیں۔انہوں نے مطالبہ کیا کہ وفاقی حکومت چھ سو ارب روپے امن و امان کے فنڈز کا حساب لے۔این ایف سی ایوارڈ میں پیسوں کی تقسیم سے پہلے ان کے خرچ کا حساب ہونا چاہیے۔ صوبائی وزیر نے پانی کی تقسیم کے مسئلے پر سیاست کو افسوسناک قرار دیتے ہوئے کہا کہ بلاول بھٹو کو جلسوں میں کھڑے ہو کر مسئلہ حل کرنے کے بجائے ذمے دارانہ کردار ادا کرنا چاہیے۔پریس کانفرنس کے اختتام پر انہوں نے تھیٹرز کے ماحول پر تحفظات کا اظہار کرتے ہوئے کہا کہ اس بارے میں وزیر اعلی سے بات کی گئی ہے اور جلد نیا لائحہ عمل سامنے آئے گا۔ انہوں نے الزام لگایا کہ تھیٹرز کی جانب سے انہیں بلیک میل کیا جا رہا ہے اور قانونی کارروائی کی دھمکیاں دی جا رہی ہیں۔عظمی بخاری نے کہا کہ مسلم لیگ (ن) کا طرہ امتیاز ہے کہ ان کے دور حکومت مین ہمیشہ سے صوبے اور ملک نے ترقی کی ہے، آگے بھی اسی روایت کو جاری رکھا جائے گا۔
