ڈیرہ اسماعیل خان (این این آئی)ڈیرہ اسماعیل خان کے گائوں رمک میں ذاتی دشمنی پر فائرنگ کرکے 3بہنوں کے قتل کا مقدمہ 4بھائیوں کے خلاف درج کر لیا گیا۔پولیس کے مطابق لواحقین کا الزام ہے کہ ملزمان بھائیوں نے ایک سال قبل اپنی بہن کو جلا کر مارنے کا بدلہ لینے کیلئے اپنے بہنوئی کی تین بہنوں کو فائرنگ کرکے قتل کیا۔پولیس کے مطابق مقتول لڑکیوں کی والدہ نے بتایا کہ گزشتہ رات اس کی 24، 28 اور 32 سال کی تین بیٹیاں گھر کے برآمدے میں چارپائی پر سو رہی تھیں کہ رات نو بجے مسلح ملزمان گھر میں داخل ہوئے اور فائرنگ کردی۔

جس سے تینوں لڑکیاں موقع پر ہی جاں بحق ہوگئیں۔ پولیس کے مطابق ایک سال قبل اسی گھر میں بیاہ کر آنے والی خاتون جل کر جاں بحق ہوگئی تھی جسے خودکشی کا رنگ دیا گیا تھا۔ لیکن مقتولہ کے بھائیوں نے بہن کو قتل کیے جانے کا مقدمہ اپنے بہنوئی اور اس کی دو بہنوں کے خلاف درج کروایا تھا۔ جو گرفتار ہونے کے بعد ضمانت پر رہا ہوگئے تھے۔گزشتہ رات ہونے والے واقعے پر لواحقین کی رپورٹ پر پولیس نے چار بھائیوں کے خلاف مقدمہ درج کرلیا تاہم کسی کی گرفتاری عمل میں نہیں آسکی۔