ریاض (این این آئی)کم لاگت والی سعودی ائیرلائن فلائی اے ڈیل نے 2فروری 2025ء سے پاکستان کے تجارتی مرکز کراچی کیلئے شیڈول پروازیں شروع کرنے کے منصوبے کا اعلان کردیا۔ایئر لائن حکام کے بیان کے مطابق یہ اقدام اس کی بین الاقوامی توسیعی حکمت عملی میں ایک اہم سنگ میل کی نشاندہی کرتا ہے اور یہ پاکستان اور جنوبی ایشیا کیلئے اس کی پہلی شیڈول سروس کی بھی نمائندگی کرتا ہے۔

رپورٹ کے مطابق 2فروری سے فلائی اے ڈیل کی کراچی سے سعودی عرب کے شہر ریاض اور جدہ کیلئے ہفتے میں دو پروازیں ہوں گی۔ ایئر لائن کے سی ای او سٹیون گرین وے نے کہا کہ وہ جلد ہی پاکستان کے دیگر شہروں کیلئے مزید پروازیں شامل کرنے کا ارادہ رکھتے ہیں۔ائیرلائن کے سی ای او سٹیون گرین وے نے کراچی کو ایک نئی منزل بنانے کیلئے مل کر کام کرنے پر پاکستانی حکام اور ان کی ٹیم کی تعریف کی۔ انہوں نے کہا کہ چونکہ سعودی عرب اور پاکستان کے درمیان مضبوط ثقافتی اور تاریخی تعلقات ہیں، اور بہت سے لوگ دونوں ممالک کے درمیان کاروبار، زیارت یا خاندان سے ملنے کیلئے سفر کرتے ہیں، اس لئے ایئر لائن کیلئے اس روٹ پر پرواز شروع کرنے کا منصوبہ بنایا۔انہوں نے بتایا کہ ایئر لائن رواں برس کے آغاز میں پاکستان کیلئے خصوصی حج چارٹر پروازیں چلانے میں کامیاب رہی تھی۔ انہوں نے کہا کہ کراچی کیلئے پروازیں شروع کرنا ایئرلائن کیلئے بڑا قدم ہے کیونکہ یہ جنوبی ایشیا کیلئے ان کی پہلی باقاعدہ پرواز ہے۔