صوابی(این این آئی)موضع جہانگیرہ میں مکان کے تنازعہ پر ماموں نے گھر کے اندر اپنے نوجوان بھانجے پر اسلحہ آتشین سے فائرنگ کرکے موت کے گھاٹ اتار دیا ۔ زوجہ سہراب سکنہ جہانگیرہ محلہ اعوان نے تھانہ تورڈھیر میں ایف آئی آر درج کراتے ہوئے بتایا کہ وہ گزشتہ روز اپنے 21سالہ بیٹے محمد سعد اور بیٹی کے ہمراہ بھائی ابرار کے گھر میں موجود تھی کہ اس دوران ان کے بیٹے محمد سعد اور بھائی اسرار کے مابین زبانی تکرار اور ہاتھا پائی شروع ہوئی،
جس پر ان کے بھائی اسرار نے اسلحہ آتشین سے ان کے بیٹے محمد سعد پر فائرنگ شروع کردی جس کے نتیجے میں وہ موقع پر جاں بحق جبکہ وہ معجزانہ طور پر بال بال بچ گئے ، رپورٹ میں وجہ عناد تنازعہ مکان بیان کی گئی ہے ،دریں اثنا موضع مینء میں گلی کھیلتے ہوئے نامعلوم ٹریکٹر ٹرالی نے دو بچوں کو کچل کر رکھ دیا ٹریکٹر ٹرالی کے ٹائر کے نیچے آنے سے چار سالہ بچہ حبیب اللہجاں بحق جبکہ ان کا تین سالہ بہن حفصہ بچی زخمی ہوگئی ، آصف علی کی رپورٹ پر ٹوپی پولیس نے نامعلوم ڈرائیور کے خلاف ایف آئی آر درج کرکے تفتیش شروع کردی ہے ۔
