راولپنڈی (این این آئی)وزیراعلی خیبر پختونخوا علی امین گنڈاپور نے کہا ہے کہ 9مئی واقعات کے ہم ذمہ دار نہیں ہیں جس کی غلطی ہے اس کو اپنی غلطی ماننا پڑے گی۔راولپنڈی میں اڈیالہ جیل کے باہر میڈیا سے گفتگو کرتے ہوئے وزیراعلی خیبر پختونخوا علی امین نے کہا کہ آئین کی بالادستی اور حقیقی آزادی کیلئے قوم کھڑی رہے گی۔انہوں نے کہا کہ زبردستی کے کاموں سے مذاکرات نہیں ہوتے، جنہوں نے پارٹی چھوڑی ان کو کچھ نہیں کہا گیا، ہماری خواتین اب بھی جیلوں میں ہیں۔

انہوں نے کہا کہ بانی پی ٹی آئی نے کہا ہے کہ ہمارے مینڈیٹ کو چھینا گیا ہے۔انہوں نے کہا کہ 9مئی کو ہمارے خلاف سازش کی گئی، واقعات کے ہم ذمہ دار نہیں،غلطی ثابت ہوئی تو معافی مانگنے کو تیار ہوں گے لیکن پہلے غلطی ثابت بھی تو کی جائے۔انہوں نے کہا کہ غلطی آپ کی ہو اور کہا جائے معافی مانگی جائے تو ایسا تو نہیں ہوسکتا۔انہوں نے کہا کہ جس کی غلطی ہے اس کو اپنی غلطی ماننا پڑے گی۔ انہوں نے کہا کہ تحریک انصاف کو ملکی حالات پر تشویش ہے، آئین کو بار بار توڑنے پر بات ضرور ہونی چاہئے۔