راوالپنڈی / سیالکوٹ (این این آئی)راوالپنڈی اور سیالکوٹ میں تیز ہوائوں، بارش آندھی اورطوفان کے باعث مختلف حادثات میں 4بچوں سمیت 6افراد جاں بحق اور 15سے زائد زخمی ہوگئے۔تفصیلات کے مطابق راولپنڈی کے نواحی علاقہ گوجرخان میں طوفانی ہوائوں اور بارش کے باعث مختلف حادثات میں 3بچے جاں بحق اور 15زخمی ہوگئے۔ذرائع کے مطابق طوفانی ہوائوں اور بارشوں کے باعث گھروں کی چھتیں اور درخت گرنے کے درجنوں واقعات رونما ہوئے، درخت، دیواریں اور چھتیں گرنے سے 3بچے جان کی بازی ہار گئے۔ریسکیو زرائع نے بتایا کہ نواحی علاقہ سنگنی میں چھت گرنے سے 14سالہ لڑکی اریبہ جاں بحق ہو گئی جبکہ چنگا بنگیال میں چھت گرنے سے 2 بچے 8سالہ ظل حسن اور 9سالہ حیدر عباس جان کی بازی ہار گئے۔

ریسکیو ذرائع کے مطابق حادثات میں 15زخمیوں کو تحصیل ہیڈ کوارٹر اسپتال منتقل کر دیا گیا، جن میں 12سالہ علیزے اور 4سالہ فرحان کو زخمی حالت میں راولپنڈی ڈی ایچ کیو منتقل کیا گیا۔دوسری جانب سیالکوٹ میں تیز آندھی اور طوفان کے باعث مختلف حادثات میں 3افراد جاں بحق ہوگئے۔کشمیر روڈ پر محلہ اسلام نگر میں کباڑ خانے کی خستہ حال دیوار گرنے سے 2 افراد ملبے تلے آ کر دب گئے۔ریسکیو ون ون ٹو ٹو نے ملبے سے عاقب اور قمر کو نکال کر اسپتال منتقل کیا جہاں 27سالہ عاقب دم توڑ گیا۔تحصیل پسرور کے علاقہ بھاگ میں چچا بھتیجا آسمانی بجلی گرنے سے جاں بحق ہوگئے، 32سالہ راحیل اور 12سالہ محمد علی کھیتوں میں چارہ کاٹ رہے تھے کہ ان پرآسمانی بجلی گری۔