لاہور( این این آئی)پاکستان تحریک انصاف کی سینئر رہنما مسرت جمشید چیمہ نے کہا ہے کہ کمشنر راولپنڈی ڈویژن نے پی ٹی آئی سمیت دیگر جماعتوں کے انتخابات بارے شدید تحفظات پرسچ کی مہر ثبت کر دی ہے ،کمشنر راولپنڈی نے خود کشی کرنے کی بجائے حقائق پوری قوم کے سامنے رکھ کر رہتی دنیا تک اپنا نام امر کر لیا ہے ۔
ایکس پر جاری اپنے بیان میں مسرت جمشید چیمہ نے کہا کہ کمشنر راولپنڈی کی پریس کانفرنس سے ثابت ہو گیا ہے کہ عام انتخابات میں عوام کے مینڈیٹ پر ڈاکہ ڈالا گیا ، باقی بیورو کریٹس کو بھی چاہیے کہ وہ کمشنر راولپنڈی ڈویژن کی تقلید کریں اور جرات کا مظاہرہ کرتے ہوئے بتائیںکہ کس طرح الیکشن کے نام پر قوم کے ساتھ بھونڈا مذاق کیا گیا ہے ۔ انہوںنے کہاکہ کمشنر راولپنڈی ڈویژن کی پریس کانفرنس کے بعد انتخابات کے حوالے سے دودھ کا دودھ اور پانی کا پانی ہو گیا ہے ۔
