کراچی(این این آئی)پاکستان پیپلزپارٹی نے سندھ اسمبلی میں برتری حاصل کرنے کے بعد وزیراعلیٰ اور صوبائی کابینہ کی تشکیل نو پر سوچ بچار شروع کردیاہے، مراد علی شاہ کو وزیراعلی کا مضبوط امیدوار قرار دیا جارہا ہے۔پاکستان پیپلزپارٹی کی قیادت نے سندھ میں حکومت بنانے اور کابینہ میں وزارتوں کے قلمدان دینے کے حوالے سے مشاورت شروع کردی ہے۔ ذرائع کا دعویٰ ہے کہ وزارت اعلیٰ کے لئے مراد علی شاہ مضبوط امیدوار ہیں۔پیپلزپارٹی کے ذرائع نے بتایاکہ سید مراد علی شاہ کو تیسری مرتبہ وزیر اعلی بنایا جائے گا، جس کی چیئرمین پیپلز پارٹی بلاول بھٹو زراداری اور آصف زرداری نے منظور دے دی ہے۔
ذرائع کے مطابق نئے سیٹ اپ میں بھی اسپیکر کی کرسی کیلئے آغا سراج درانی کا نام زیر گردش ہے جبکہ اور ڈپٹی اسپیکر کے طور پرشہلارضا کا نام سامنے آرہا ہے۔ذرائع کے مطابق سندھ کابینہ ابتدائی طور پر شرجیل میمن، ناصرشاہ، سعید غنی، امتیاز شیخ، سہیل انور سیال، ارباب لطف اللہ، اسماعیل راہو، عذرا پیچوہو، سردار شاہ، مکیش چائولہ ، مخدوم محبوب الزمان کو کابینہ میں شامل کیا جائے گا۔جام خان شورو، تیمور تالپور کو بھی سندھ کابینہ میں شامل کرنے پر غور کیا جارہا ہے تاہم دونوں میں سے کسی ایک کو وزارت دینے کا فیصلہ پارٹی قیادت کی مشاورت سے کیا جائے گا۔
ذرائع نے مزید دعوی کیا کہ ڈاکٹرعذرہ پیچوہو اور فریال تالپور بھی صوبائی کابینہ میں شامل ہوں گی۔ذرائع کے مطابق کابینہ میں کچھ نئے چہرے بھی کابینہ میں شامل ہوں گے۔سندھ کابینہ کے حوالے سے پی پی قیادت کی جانب سے فیصلے جلد متوقع ہے۔ ذرائع نے بتایاکہ پیپلز پارٹی قیادت نے مراد علی شاہ، ناصر شاہ، شرجیل میمن، سعید غنی کو گزشستہ روز اسلام آباد بھی طلب کیا تھا اور اس ملاقات میں انہیں حکومت سازی سے متعلق اعتماد میں لے گیا تھا۔
