لاہور( این این آئی)استحکام پاکستان پارٹی کے سینئر رہنما عون چوہدری نے کہا ہے کہ آزاد امیدواروں کے جیتنے پر حیرت نہیں، آگے آگے دیکھیں کیا ہوتا ہے،آزاد امیدواروں سے کہتا ہوں کہ پاکستان کے استحکام کا سوچیں۔نجی ٹی وی سے گفتگو کرتے ہوئے انہوںنے کہا کہ انہوں نے کہا کہ جیت پر حلقے کی عوام اور مسلم لیگ (ن)کا شکریہ ادا کرتا ہوں، ایک ایک یو سی میں انتخابی مہم چلائی ہے، حلقے میں میری برادری ہے، اسی حلقے میں پلا بڑھا ہوں۔

یہاں گجر برادری کے 60 ہزار ووٹ ہیں۔ انہوںنے کہا کہ شیروں کے سربراہ نے مجھے ووٹ ڈالا، شہباز شریف نے ووٹ ڈالا، ووٹ دینے پر شہباز شریف کا مشکور ہوں۔انہوںنے کہاکہ ہماری مسلم لیگ (ن) سے انڈر اسٹینڈنگ ہے، ہمارا مقصد ہے کہ ملک میں سیاسی استحکام آئے، پارٹی سربراہ ملک کی بہتری کے لیے فیصلہ کریں۔انہوں نے کہاکہ الزامات کی سیاست سے نکلیں، ملک کی بہتری کے لیے کچھ بھی کرنا پڑے کرنا چاہیے۔انہوںنے الزام عائد کیاکہ مخالف امیدوار کے لوگوں نے ہم پر فائرنگ بھی کی۔