لاہور ( این این آئی) لاہور کے حلقہ این اے 122میں مسلم لیگ (ن) کے مضبوط امیدوار خواجہ سعد رفیق شکست کھا گئے ، لیگی امیدوار نے شکست تسلیم کر لی ۔مسلم لیگ کے سینئر رہنما خواجہ سعد رفیق کو آزاد امیدوار سردار لطیف کھوسہ نے بڑے مارجن سے شکست دی۔غیر حتمی و غیر سرکاری نتائج کے مطابق این اے 122سے پاکستان تحریک انصاف کے حمایت یافتہ آزاد امیدوار سردار لطیف کھوسہ ایک لاکھ 17ہزار 109لیکر کامیاب ہوئے جبکہ لیگی امیدوار خواجہ سعد رفیق 77ہزار 907ووٹ لیکر دوسرے نمبر پر رہے۔

مسلم لیگ (ن) کے رہنما خواجہ سعد رفیق نے شکست تسلیم کر لی۔سوشل میڈیا پلیٹ فارم ایکس پر جاری کیے گئے بیان میں سابق وزیر ریلوے خواجہ سعد رفیق نے ہار تسلیم کرتے ہوئے پاکستان تحریک انصاف کے حمایت یافتہ آزاد امیدوار سردار لطیف کھوسہ کو مبارکباد پیش کر دی۔ان کا کہنا تھا کہ عوامی فیصلے پر خوش دلی سے سر تسلیم خم کرتا ہوں۔اللہ کریم آنے والی پارلیمان کو متحد ہو کر قومی بحرانوں پر قابو پانے کی توفیق و تقویت عطا کرے! آمین۔