کراچی (این این آئی) بچوں کو اغوا کرکے فروخت کرنے والا مطلوب ملزم کو رنگے ہاتھوں گرفتار کرکے امہ ہانی نامی بچی کو بازیاب کرالیا گیا۔تفصیلات کے مطابق کراچی کے ڈسٹرکٹ سٹی میں بچوں کو اغوا کرکے فروخت کرنے والے مطلوب ملزم کو رنگے ہاتھوں گرفتارکرلیا گیا۔ایس ایس پی سٹی امجد حیات نے بتایا کہ ملزم کو علاقہ تھانہ چاکیواڑہ کی حدود سے گرفتار کیا گیا اور امہ ہانی نامی بچی بازیاب کرالی گئی ہے ۔امجد حیات کا کہنا تھا کہ ملزم کی شناخت سمیر کے نام سے ہوئی ہے، ملزم نے گزشتہ شام مچھر کالونی کے علاقے سے امہ ہانی نامی بچی کو اغوا کیا تھا۔
ایس ایس پی سٹی نے کہا کہ ملزم بچی کو اغوا کرکے اپنے بھائی اور بہن کے پاس لیکرجا رہا تھا، بچی کے اغوا کا مقدمہ تھانہ ڈاکس میں درج ہے۔انہوںنے کہا کہ ملزم اور ملزم کے بھائی بہن نے ملکر اس سے قبل بھی تین بچیوں کو اغوا کیا ہے، ملزم بچیوں کو اغوا کرنے کے بعد گوادر میں جا کر فروخت کرتا ہے۔ملزم کو مزید کاروائی کیلئے ڈاکس تھانے منتقل کر دیا گیا ہے اور ملزم کے بھائی اور بہن کی تلاش جاری ہے۔
