راولپنڈی (این این آئی)بانی پی ٹی آئی عمران خان نے کہا ہے کہ کیسز تیزی سے چل رہے ہیں ،ایسا لگ رہا ہے میچ فکس ہے،پی ٹی آئی کو کوئی نہیں روک سکتا ،ہمارا نشان بدلا ہے ایمان نہیں،ڈونلڈ لو کو بچانے کی کوشش کی جار ہی ہے۔ تفصیلات کے مطابق راولپنڈی اڈیالہ جیل میں سائفر کیس کی سماعت کے موقع پر کمرہ عدالت میں صحافیوں سے غیر رسمی گفتگو کرتے ہوئے سابق وزیراعظم عمران خان نے کہا کہ سائفر کیس میں اسد مجید اور سہیل محمود اہم گواہ ہیں، ڈونلڈ لو کو بچانے کی کوشش کی جارہی ہے۔

انہوں نے کہا کہ کیسز بہت تیزی سے چل رہے ہیں ،ایسا لگ رہا ہے میچ فکس ہے لیکن پی ٹی آئی کو کوئی نہیں روک سکتا کیونکہ ہمارا نشان بدلا ہے ایمان نہیں۔انہوں نے کہا کہ پاکستان کے اندر الیکشن ڈس کریڈٹ کر دیا گیا ہے، اگر صاف و شفاف الیکشن نہ ہوئے تو پاکستان میں معیشت ڈوب جائے گی، اس لئے چاہتے ہیں اسٹیبلشمنٹ کے ساتھ مذاکرات ہوں۔ انہوں نے کہاکہ مجھے بندھے ہاتھوں سے صرف ایک جلسہ کرنے دیں یہ ملکی تاریخ کا بڑا جلسہ ہو گا۔

انہوں نے کہا کہ فینڈمینٹل رائٹس کا تحفظ سپریم کورٹ کی ذمہ داری ہے، ہماری پارٹی کو اٹھنے نہیں دیا جارہا ،سپریم کورٹ سوموٹو ایکشن لے۔انہوں نے کہا کہ آئین کے آرٹیکل 15، 16 اور 17 کی خلاف ورزی کی جارہی ہے۔انہوں نے کہاکہ اتنا کچھ ہونے کے باوجود ہمارے کارکنان نکلے اس پر مبارکباد دیتا ہوں۔