کراچی(این این آئی)کراچی کے علاقے کلفٹن میں تین تلوار پر فائرنگ اور ہنگامہ آرائی کے الزام میں پی ٹی آئی کے 5ہزار کارکنوں کے خلاف انسداد دہشت گردی اور دیگر 11دفعات کے تحت مقدمہ درج کر لیا گیا ۔تفصیلا ت کے مطابق کراچی کے علاقے کلفٹن میں تین تلوار پر فائرنگ اور ہنگامہ آرائی کے الزام میں پی ٹی آئی کے 5ہزار کارکنوں کیخلاف انسداد دہشت گردی اور دیگر 11دفعات کے تحت مقدمہ درج کر لیا گیا ہے۔فریئر تھانے میں درج ایف آئی آر نمبر 31/24کے تحت 15پی ٹی آئی کارکنان گرفتار ہیں، گرفتار ملزمان میں گلزار قاضی، ایاز رحیم، سلطان رحیم، عبدالستار، محمد فہیم شامل ہیں، عدم گرفتار شدہ 4 سے 5 ہزار نامعلوم صورت شناس ملزمان بھی مقدمہ میں نامزد ہیں۔

مقدمات کے مطابق ایک دو روز سے سوشل میڈیا پر پی ٹی آئی کارکنان پرتشدد احتجاج کیلئے تیاری کر رہے تھے، اتوار کی شام مختلف علاقوں سے 4سے 5ہزار کارکنان تین تلوار پر جمع ہوئے، پی ٹی آئی کے پاس ریلی یا جلسے کا قانونی اجازت نامہ نہیں تھا۔ پولیس کی جانب سے انہیں ٹریفک اور دیگر معاملات میں خلل ڈالنے سے منع کیا گیا، مقدمے میں درجن سے زائد پولیس افسران اور ملازمین کو زخمی کرنے کا الزام بھی شامل ہے۔ ایف آئی آر کے مطابق پی ٹی آئی کارکنان کی فائرنگ اور پتھرائو سے خوف و ہراس پھیلا اور پی ٹی آئی کی قیادت اور کارکنان کی دہشت گردی کی وجہ سے دکانیں بند کر دی گئیں۔