راولپنڈی (این این آئی)پاکستان تحریک انصاف کے بانی عمران خان نے کہا ہے کہ عارف علوی کی کوئی نہیں سن رہا، نواز شریف مفرور ہے اس کو ریلیف پر ریلیف دیا جارہا ہے۔صحافیوں سے گفتگو میں عمران خان نے کہاکہ نواز شریف اور آصف زرداری کے کیسز اوپن اینڈ شٹ ہیں، ان کو کوئی نہیں پوچھتا، میرے کیسز کا ٹرائل روزانہ ہورہا ہے۔

صحافی نے سوال کیا کہ آپ کے وکلا پیش نہیں ہو رہے گواہوں پر جرح سے مسلسل التوا مانگا جارہا ہے؟ اس پر انہوں نے کہا کہ ہمارے بیشتر وکلا الیکشن مہم میں ہیں، کیسز بھی بہت زیادہ ہیں کیسے پیش ہونگے؟ ہماری انسانی حقوق سیمتعلق درخواست سپریم کورٹ میں ہے، اس کو نہیں سنا جا رہا۔

صحافی نے سوال کیا کہ آپ صدر مملکت سے انسانی حقوق کی درخواست کے بارے میں کیوں نہیں بات کر رہے؟ عمران خان کا کہنا تھاکہ عارف علوی کی کوئی نہیں سن رہا، نواز شریف مفرور ہے اس کو ریلیف پر ریلیف دیا جارہا ہے۔انہوںنے کہاکہ میں 6 ماہ سے جیل میں ہوں، میری پارٹی کے خلاف کریک ڈاؤن جاری ہے، ہمارا حق چھینا جارہا ہے، ہماری نمائندگی سرکاری وکیل کیسے کرسکتے ہیں۔