شیخوپورہ (این این آئی)شیخوپورہ میں کھانا تاخیر سے ملنے پر سسر کی جانب سے بچوں کے سامنے بہو پر بہیمانہ تشدد کی ویڈیو وائرل ہوگئی جس کے بعد واقعے کا مقدمہ درج کرلیا گیا تاہم پولیس ملزم کو تاحال گرفتار نہیں کر سکی ۔ پولیس کے مطابق تشدد کی شکار خاتون کا شوہر روزگار کے لیے جنوبی افریقا میں ہے، واقعے کے روز ملزم کے دوسرے بیٹے نے تشدد کی ویڈیو بنا کر اپنے رشتیداروں کو بھیجی جو کہ وائرل ہوگئی۔وائرل ویڈیو میں بزرگ شخص کو بچوں کے سامنے خاتون پر تشدد کرتے دیکھا جاسکتا ہے۔
پولیس کے مطابق جنڈیالہ شیرخان میں سسر کے بہو پر تشدد کے واقعے کا مقدمہ درج کرلیا گیا ہے۔ایف آئی آر کے مطابق ملزم لطیف نے اپنی بہو کو تشدد کا نشانہ بنایا، تشدد کے دوران ملزم اپنی بہو کو سنگین نتائج کی دھمکیاں بھی دیتا رہا ہے۔پولیس کے مطابق ملزم منڈی جھبراں میں اجناس کی خریدوفروخت کا کام کر تا ہے،ملزم کی گرفتاری کے لیے منڈی جھبراں میں بھی چھاپہ مارا گیا، ملزم کا بیٹا زیر حراست ہے، ملزم کی گرفتاری کے لیے چھاپے مارے جارہے ہیں۔دوسری جانب متاثرہ خاتون نے کہاکہ سسر سے بدتمیزی کی تو انھوں نے ہاتھ اٹھایا ہمارا گھریلو مسئلہ تھا جس میں صلح ہوگئی۔
