لاہور(این این آئی)سینیٹ انتخابات میں اپ سیٹ ہونے پر سوشل میڈیا پر سابق صدر مملکت آصف علی زرداری کی سیاست کے چرچے رہے، ایک زرداری سب پر بھاری، اگلی باری پھر زرداری،آصف زرداری کا جادو چل گیا کا ٹرینڈ دیکھنے میں آیا۔ تفصیلات کے مطابق سینیٹ انتخابات میں پی ڈی ایم کے امیدوار کی کامیابی کے
بعد آصف علی زرداری سوشل میڈیاپر چھائے رہے اور ایک زرداری سب پر بھاری، اگلی باری پھر زرداری،آصف زرداری کا چل گیا کا ٹرینڈ دیکھنے میں آیا۔ اپ سیٹ شکست کے بعد حکمران جماعت کے حامی مایوس نظر آئے اور سوشل میڈیا پر ان کی معمول کے دنوں سے انتہائی کم سر گرمیاں دیکھنے میں آئیں۔دوسری جانب سینیٹ انتخابات میں حکمران جماعت تحریک انصاف کے امیدوار عبد الحفیظ شیخ اور پاکستان ڈیمو کریٹک موومنٹ کے مشترکہ امیدوار سید یوسف رضا گیلانی اکٹھے بیٹھے رہے، نتائج کا اعلان ہونے پر عبد الحفیظ شیخ نے اپنے حریف امیدوار یوسف رضا گیلانی کو گلے مل کر مبارکباد اور تھپکی دی۔ تفصیلات کے مطابق سینیٹ انتخابات کیلئے کئی نشستوں پر مقابلہ ہوا لیکن اسلام آباد کی نشست پر ہونے والی پولنگ سارے انتخابی عمل پر چھائی رہی اور اعصاب شکن ماحول دیکھنے میں آیا۔ انتہائی دلچسپ امر یہ ہے کہ امیدواروں کے پولنگ ایجنٹس ووٹوں کی گنتی کے دوران انتہائی پریشان دکھائی لیکن اس کی وجہ بننے والے عبد الحفیظ شیخ اور سید یوسف رضا گیلانی بظاہرین انتہائی مطمئن نظر آئے اور اکٹھے بیٹھے باتوں میں مصروف رہے۔ دونوں امیدواروں نے ایوان میں زیادہ تر وقت اکٹھے گزارا۔
