اسلام آباد (این این آئی)پاکستان مسلم لیگ (ن) کی نائب صدر مریم نوا ز نے کہا ہے کہ آج ایک اورکربلا دیکھی ،غمِ حسین تازہ ہو گیا۔جمعرات کو سانحہ مچھ میں شہید ہونے والوں کی لواحقین سے اظہار تعزیت کے بعدمریم نواز نے اپنے ٹویٹ میں کہا کہ ان دکھی ماوں،بہنوں بیٹیوں کے غم کا اندازہ کون لگا سکتا ہے جن کو جی بھر کے رونے کے

لیے کوئی کندھا بھی نہیں ملا۔انہوں نے کہا کہ میں کیسے بھول پائوں گی غم میں آہیں بھرتی ان خواتین کو جو مجھ سے لپٹ کر دھاڑیں مار کر روئیںجن کے آنسوں سے میرا کوٹ تر ہوگیا۔ انہوں نے کہا کہ آج ایک اورکربلا دیکھی ،غمِ حسین تازہ ہو گیا۔دریں اثناء پاکستان مسلم لیگ(ن) کی نائب صدر مریم نواز شریف نے کہا ہے کہ ارباب اختیار اور اقتدار کی کرسی پربیٹھے شخص کی بے حسی پر افسوس ہے ،مائیں ،بہنیں ،بیٹیاں اپنے پیاروں کی لاشیں رکھ کر عمران خان کو دہائی دے رہی ہیں کہ خدارا ہمارے سر پر ہاتھ رکھو، عمران خان اپنی انا کی وجہ سے یہاں نہیں آرہے ،اگر حکمران کوئٹہ نہیں آتا تو قوم اسے اسلام آباد میں کرسی پر بیٹھنے کی اجازت نہیں دیگی۔ یہ بات انہوں نے جمعرات کو مچھ کے علاقے میں قتل کئے گئے کان کنوں کی نعشوں کے ہمراہ دھرنا دینے والے لواحقین اورہزارہ قوم کے افراد سے خطاب کرتے ہوئے کہی ۔اس موقع پر پاکستان پیپلزپارٹی کے چیئرمین بلاول بھٹو زرداری ،سابق وزیراعظم سید یوسف رضا گیلانی ،وزیراعلیٰ سند ھ سید مراد علی شاہ ، سیکرٹری جنرل مسلم لیگ (ن)احسن اقبال ، سینیٹرمولانا عبدالغفور حیدری،سینیٹر سرداریعقوب خان ناصر،سینیٹر پرویز رشید،سابق وفاقی خرم دستگیر،رانا ثناء اللہ ،حنا پرویز ،ارکان بلوچستان اسمبلی اصغرعلی ترین ،یونس عزیز زہری،پیپلز پارٹی کے  صوبائی صدر حاجی علی مدد جتک،جنرل سیکرٹری سیداقبال شاہ ، سیکرٹری اطلاعات سردارسربلند جوگیزئی،مسلم لیگ(ن) کے صوبائی جنرل سیکرٹری جمال شاہ کاکڑ ،نعمان خان ناصرسمیت دیگر بھی موجود تھے۔