اسلام آباد(مانیٹرنگ ڈیسک/ این این آئی )پی ڈی ایم نے فائنل رائونڈ کھیلنے کی تیار ی تیزی کر دی ۔ اپوزیشن جماعتوں نے لاہور جلسے کے بعد فائنل رائونڈ کھیلنے کی تیاری کرلی۔یاد رہے کہ پی ڈی ایم نے 13دسمبرکو مینار پاکستان کے گرائونڈ میں عوامی طاقت کے مظاہرے کا اعلان کیا ہوا ہے ، یہ جلسہ چاروں صوبوں میں بڑے جلسوں کی سیریزکا آخری جلسہ ہوگا۔ن لیگ کے

ذرائع نے بتایا کہ لاہور جلسے کے بعد فیصلہ کن لائحہ عمل کا اعلان ہو گاجبکہ پاکستان ڈیمو کریٹ مومنٹ کے رہنمائوں کا خیال ہے کہ اس جلسے کے بعد اسلام آباد کی طرف لانگ مارچ کی کال دی جائے گی اس حوالے سے تاریخ بھی طے کی جارہی ہیں ۔ دوسری جانب کورونا کیسز کی بڑھتی شدت کے پیش نظر حکومت پنجاب نے پی ڈی ایم کے لاہور اور ملتان کے جلسوں کی اجازت نہ دینے کا اصولی فیصلہ کیا ہے، بغیر اجازت جلسوں کی صورت میں قانونی کارروائی کی جائے گی۔ پنجاب کےذرائع کے مطابق لاہور اور ملتان کے جلسوں کی اجازت نہ دینے کا فیصلہ کورونا کی تیزی سے بگڑتی صورتحا ل کے پیش نظر کیا جا رہا ہے۔حکومت کی جانب سے تحریری طور پر پی ڈی ایم کو جلسوں کی اجازت نہیں دی جائے گی، ملتان اور لاہور میں کورونا کیسز کی شرح میں بھی تیزی سے اضافہ ہو رہا ہے۔ ملتان میں اس وقت کرونا کے پازیٹو کیسز کی شرح پاکستان میں دوسرے نمبر پر ہے، پنجاب میں انتہائی تشویش ناک مریضوں کی تعداد بھی جون کے پہلے ہفتے جتنی ہو گئی ہے، متعلقہ اداروں نے بھی جلسوں کی اجازت نہ دینے کی سفارش کی تھی۔محکمہ صحت بھی کورونا کیسز کی خطرناک شرح سے حکومت پنجاب کو اپنی سفارشات سے آگاہ کر چکا ہے۔ حکومت پنجاب کے ذرائع کے مطابق بغیر اجازت جلسے پر اپوزیشن قیادت کے خلاف قانونی کارروائی کی جائے گی، بغیر اجازت جلسے کی صورت میں پی ڈی ایم قیادت کو مقدمات کا سامنا کرنا پڑے گا، پی ڈی ایم قیادت نے لاہور اور ملتان میں جلسوں کی اجازت کے لئے تحریری درخواستیں دے رکھی ہیں۔