اسلام آباد(آن لائن+ این این آئی ) اسلام آباد میں کورونا وائرس بے قابو ہوگیا ، وفاقی دارالحکومت اسلام آباد کے مزید 25 تعلیمی اداروں کو کورونا وائرس کے کیسز سامنے آ نے پر سیل کر دیا گیا ہے۔ڈی ایچ او اسلام آباد ضعیم ضیاء نے تعلیمی اداروں کو سیل کرنے کے مراسلہ جاری کر دیا ہے۔ سیل کئے گئے تعلیمی اداروں میں سرکاری اور نجی تعلیمی ادارے دونوں شامل ہیں۔ مراسلے کے
مطابق متاثرہ افراد سے رابطہ میں رہنے والے افراد کو 14 دن کے لئے قرنطینہ میں رہنے کی ہدایت کی گئی ہے۔ ڈی ایچ او ضعیم ضیاء نے بتایا ہے کہ اسلام آباد میں سیل کئے گئے تعلیمی اداروں کی تعداد 120 ہو چکی ہے۔دوسری جانب پنجاب میں دو ماہ کے دوران اسکولوں میں چار سو بہتر کورونا کیسز سامنے آ چکے ہیں۔ترجمان محکمہ اسکول کے مطابق ایک سو سترہ اسکولوں میں وائرس کی تصدیق ہوئی ہے جب کہ سولہ کو سیل کیا گیا ہے۔انہوں نے بتایا ہے کہ کورونا کے سب سے زیادہ کیسز راولپنڈی شہر سے سامنے آئے ہیں۔ان کا کہنا تھا کہ راولپنڈی کے اسکولز میں 8 ہزار سے زائد ٹیسٹ کئے گئے جن میں سے 78 کورونا کیسز رپورٹ ہوئے ہیں۔دوسری جانب مزید 7 تعلیمی ادارے بھی سیل کرنے کا فیصلہ کرلیا گیا ہے۔ڈسٹرکٹ ہیلتھ آفیسر اسلام آباد نے ڈی سی اسلام آباد کو تعلیمی ادارے سیل کرنے کیلئے مراسلے بھیج دیئے۔ڈی ایچ او کے مطابق آئی ایم ایس جی سنگجانی میں 4 کورونا کیسز رپورٹ ہوئے ۔ ڈی ایچ او کے مطابق آئی ایم سی بی، ایف 11 تھری میں 3 کورونا کیسز سامنے آئے،ڈی ایچ او کے مطابق آئی ایم ایس پمز، سٹی اسکول، بیکن ہائوس اسکول، آئی ایم سی جی، آئی 9 ون اور آئی ایم ایس جی پنڈ بھگوال میں 2 کورونا کیسز رپورٹ ہوئے ،دو جامعات ڈی سیل کرنے کیلئے ڈسٹرکٹ ہیلتھ آفیسر اسلام آباد نے ڈی سی اسلام آباد کو مراسلے بھیج دیئے۔ ڈی ایچ او کے مطابق فاسٹ اور نمل یونیورسٹی کے سیل مختلف ڈیپارٹمنٹس کو ڈی سیل کرنے کا فیصلہ کر لیا گیا۔
