مہمند (این این آئی)مہمند میں ماربل کی کان میں پہاڑی تودہ گرنے سے جاں بحق افراد کی تعداد 19 تک پہنچ گئی جبکہ ریسکیو حکام نے مزید 6 لاشوں کو ملبے سے نکال لیا۔ایک بیان میں صوبائی ڈیزاسٹر منیجمنٹ اتھارٹی (پی ڈی ایم اے)کے ڈائریکٹر جنرل نے

کہا کہ اب تک 9 زخمیوں کو نکالا جاچکا ہے۔ترجمان ریسکیو 1122 بلال فیضی نے کہا کہ زیادہ تر زخمیوں کی حالت تشویشناک ہے ، انہیں میں سے 2 مہمند ہسپتال میں دوران علاج چل بسے جبکہ 5 اب بھی ملبے تلے ہیں۔ادھر ڈی جی پی ڈی ایم اے نے کہا کہ ملبے تلے پھنسے افراد کو نکالنے کے لیے ریسکیو آپریشن منگل کو بھی جاری رہا اور پشاور سے 5 ایمبولنسز اور ایک ریکوری وہیکل مہمند بھیج دی گئی ہیں۔انہوں نے کہا کہ حکام، ضلع انتظامیہ اور متعلقہ محکموں کے ساتھ قریبی رابطے میں ہیں۔ادھر وفاقی وزیر سائنس و ٹیکنالوجی فواد چوہدری نے کہا کہ مزدوروں کے لیے کام کرنے کی حالت انتہائی خراب ہے۔اپنی ٹوئٹ میں انہوںنے کہاکہ صوبائی حکومتوں کو مزدور قانون پر سختی سے عمل درآمد کو یقینی بنانا چاہیے، امید ہے کہ خیبرپختونخوا حکومت واقعے میں جاں بحق ہونے والوں کے اہل خانہ سے ساتھ کھڑی ہوگی۔