لاہور (این این آئی) صوبائی وزیراطلاعات فیاض الحسن چوہان نے کہا ہے کہ شہباز شریف کی سیاست کا سورج نواز شریف کی طرح غروب ہونے کو ہے۔اپنے بیان میں فیاض الحسن چوہان نے کہا 1990میں شہباز شریف کے ظاہر کردہ اثاثوں کی مالیت 21 لاکھ تھی،اثاثے 1998میں ایک کروڑ 8لاکھ اور 2018 میں اہل و عیال سمیت 7ارب سے زائد ہوگئے جبکہ شہباز شریف کے ڈھکے چھپے اثاثوں کی مالیت ظاہر کردہ اثاثوں سے کئی ہزار گنا

زیادہ ہے۔صوبائی وزیر اطلاعات نے کہا کہ اب نیب اور احتسابی اداروں نے آلِ شریف کی جدید سائنسی بنیادوں پر استوار کرپشن کا کچا چٹھا کھول کر رکھ دیا ہے اورپاکستانی عوام آلِ شریف کی ساری کرتوتوں سے واقف ہوچکی ہے۔فیاض الحسن چوہان کا مزید کہنا تھا کہ شہباز شریف کی سیاست کا سورج نواز شریف کی طرح غروب ہونے کو ہے،بچی کچی سیاست کو بچانے کے لئے شہباز شریف،حمزہ شہباز اور لیگی ترجمان سر توڑ کوشش کررہے ہیں۔