اسلام آباد (مانیٹرنگ ڈیسک)وفاقی دارالحکومت اسلام آباد کے علاقے بھارہ کہو میں قرنطینہ کیے گئے تبلیغی جماعت کے تمام لوگ صحت یاب ہوگئے ۔ ڈی سی اسلام آباد حمزہ شفاقت نے کہا ہے کہ بھارہ کہو میں قرنطینہ کیے گئے تبلیغی جماعت کے تمام لوگ صحت یاب ہوگئے ہیں اور تبلیغی جماعت کے تمام لوگوں کے ٹیسٹ نیگیٹیو آچکے ہیں جس کے بعد اب کل تک وہ حفاظتی انتظامات کے ساتھ گھر جا سکیں گے۔ کل تک بارہ کہو کھول دیا جائے گا، دوسری جانب وفاقی دارالحکومت اسلام آباد میں کورونا وائرس

سے پہلی ہلاکت سامنے آئی ہے جہاں پمز ہسپتال میں زیر علاج خاتون انتقال کرگئیں۔پمز ہسپتال کے حکام کے مطابق خاتون 12 مارچ کو برطانیہ سے وطن واپس پہنچی تھیں اور کورونا وارڈ میں 24 روز تک وینٹی لیٹر پر زیر علاج رہیں، خاتون کے پھیپھڑوں پر وائرس کا گہرا اثر ہوا تھا۔رپورٹ کے مطابق جڑواں شہروں راولپنڈی اسلام آباد میں سب سے پہلے ان خاتون میں کورونا وائرس کی تشخیص ہوئی تھی، ان کے شوہر اور ایک رشتہ دار میں بھی کورونا کے ٹیسٹ مثبت آئے تھے جو علاج کے بعد صحتیاب ہو گئے۔