کراچی (این این آئی)وزیر اعظم آزادحکومت ریاست جموں وکشمیر راجہ محمد فاروق حیدرخان نے کہا ہے کہ مسلمان کبھی حق بات کہنے سے نہیں ڈرتا۔آنے والا دور بہت اہم ہے اس کیلئے ہمیں اپنے آپ کو تیار کرنا ہوگا۔سوویت یونین کی طرح ہندوستان کے بھی ٹکڑے ٹکڑے ہو نگے۔پاکستان دنیا کا اہم ترین ملک ہے اسے دنیا کی کوئی طاقت نظر انداز نہیں کر سکتی۔ پاک فضائیہ نے ہمیشہ ملک کا سر فخر سے بلند رکھا۔

ہندوستان نے اگر جارحیت کا سوچا تو کشمیری افواج پاکستان کے بشانہ بشانہ صف اول میں ہونگے۔ کشمیریوں کی وابستگی پاکستان کے ساتھ ہیں۔ ہندوستان پاکستان کے پانی پر قبضہ کرنا چاہتا ہے۔ہندوستان کشمیرکا کلچر، زبان اور ہر چیز ختم کرنا چاہتا ہے۔ہندوستان مقبوضہ کشمیر کی خصوصی حیثیت ختم کر کے ڈیمو گرافی تبدیل کرنا چاہتا ہے۔ ا ن خیالات کا اظہار انہوں نے نیشنل انسٹیٹیوٹ آف میری ٹائم افئیرز میں مقبوضہ کشمیر میں ’آرٹیکل35اے اور370‘کی منسوخی کے حوالہ سے منعقدہ سمینار سے خطاب کرتے ہوئے کیا۔ سمینار سے چیف آف نیول سٹاف ظفر محمود عباسی اور مشاہد حسین سید نے بھی خطاب کیا۔ وزیر اعظم نے کہاکہ اصل مسئلہ 35اے کا ہے جس میں کشمیرکی خصوصی حیثیت تھی جو مہاراجہ ہری سنگھ نے ہندوستان کے ساتھ کیا تھا تاکہ باہر سے لوگ آکر یہاں صنعت کاری اور نوکریاں نہ حاصل کر سکیں اور کشمیریوں کا حق نہ لے سکیں۔ انہوں نے کہاکہ ہندوستان مقبوضہ کشمیر خصوصی حیثیت کو ختم کر کے مقبوضہ کشمیر کی آبادی کا تناسب تبدیل کرنا چاہتا ہے۔وہ مسلم اکثریت کو اقلیت میں تبدیل کرنا چاہتا ہے۔ وزیر اعظم نے کہاکہ کشمیریوں کی منزل پاکستان ہے۔ وہ تکمیل پاکستان کیلئے قربانیاں دے رہے ہیں۔ کشمیریوں کی قربانیوں کی وجہ سے ہندوستان مقبوضہ کشمیر کو زیادہ دیرتک قبضہ میں نہیں رکھ سکتا۔ہندوستان میں رہنے والے مسلمان بھی اب جان چکے ہیں کہ قائد اعظم کا موقف درست تھا۔ انہوں نے کہاکہ کشمیری کبھی پاکستان کو دھوکہ نہیں دے سکتا،

پاکستان نے ہمیشہ کشمیریوں کیلئے آواز بلند کی۔ کشمیریوں کی واحد امید پاکستان ہے۔ائیر مارشل اصغر خان اور نور خان کی تربیت یافتہ پاک فضائیہ کو کوئی شکست نہیں دے سکتا۔ گزشتہ سال 27فروری کو پاک فضائیہ نے ہندوستان کا غرور خاک میں ملا یادیا۔ لائن آف کنٹرول پر آباد6لاکھ سے زائد کشمیری افواج پاکستان کے شانہ بشانہ ہندوستانی فوج کا مقابلہ کرینگے۔ وزیر اعظم آزادکشمیر نے کہاکہ کشمیریوں نے قائد اعظم کے ساتھ جو فیصلہ کیا تھا اس پر قائم ہیں اور اس کی تکمیل کیلئے مقبوضہ کشمیر میں قربانیاں دے رہے ہیں۔