لاہور(نیوز ڈیسک) لاہور میں بزرگ خاتون کے ساتھ رہزنی کی خوفناک واردات کی سی سی ٹی وی بھی منظر عام پر آ گئی۔ ڈکیتی کی سی سی ٹی وی کے مطابق راہزنی کی خوفناک واردات لاہور کے علاقے نواں کوٹ کی آبادی خلیل پارک ڈھولن وال میں پیش آئی۔ کار سوار بزرگ خاتون اپنی بیٹی کے ہمراہ فوتگی پر افسوس کرنے گئی تھی کہ ڈاکوؤں نے انہیں لوٹ لیا۔ موٹر سائیکل سوار دو ڈاکو پہلے گلی میں ریکی کرتے رہے اور جیسے ہی کار رکی دونوں نقاب پوشوں نے
ان پر اسلحہ تان لیا۔ ڈاکوؤں نے بزرگ خاتون کے طلائی زیورات اتارنے کے لیے بری طرح چھینا جھپٹی کی، پہلے زور لگا کر بازوؤں سے کڑے اتارے، پھر بالیاں اتارنے کی بجائے نوچ لیں۔ اس صورتحال سے خوفزدہ خاتون کی بیٹی اپنی والدہ کے کڑے اتارنے میں مدد کرتی رہی۔ ڈاکوؤں نے یہ واردات تین منٹ میں کی اور با آسانی فرار ہو گئے۔ اس واردات کے بارے پولیس کا کہنا ہے کہ درخواست موصول ہو گئی ہے، تحقیقات جاری ہیں، جلدڈاکوؤں کو ٹریس کرلیا جائے گا۔
