کوہاٹ(این این آئی)کوہاٹ پولیس نے ملکی و غیرملکی جعلی کرنسی سمگل کرنے کو کوشش ناکام بناکر اندرون اور بیرون ملک جعلی کرنسی مارکیٹ میں پھیلانے والے بین الصوبائی جعلساز کو حراست میں لے لیا اور مبینہ ملزم کے قبضہ سے ساڑھے نو لاکھ روپے سے زائد پاکستانی اور دو لاکھ غیرملکی درہم کی جعلی کرنسی برآمدکرلی۔ پولیس کے مطابق مقامی پولیس نے ہفتہ کے روزپولیس تھانہ محمد ریاض شہید کی حدودمیں انڈس ہائی وے پر ایک
کاروائی کے دروان جعلساز گروہ کے مبینہ سرگرم رکن عتیق الرحمن سکنہ بنوں کے قبضہ سے 9 لاکھ61 ہزار روپے کی پاکستانی جعلی کرنسی اور 2 لاکھ کے جعلی درہم برآمدکرلیے۔ پولیس نے ملزم کو جعلی کرنسی سمیت حراست میں لے کرتھانہ محمدریاض شہید کوہاٹ میں مقدمہ درج کرلیا ہے۔ پولیس کے مطابق زیرحراست ملزم نے ابتدائی تفتیش کے دوران دیگر شہروں میں سرگرم جعلساز گروہ کے ارکان کے نام بھی اْگل دیئے ہیں۔
