لاہور(این این آئی) چیئرمین ٹاؤن شپ انڈسٹریز ایسوسی ایشن لاہور عظم چوہدری نے وزات خزانہ کے مالی سال2019-20سے متعلق جاری کردہ پالیسی بیان میں ملکی خسارہ9.4فیصد اور ملک پر قرضوں کا حجم402کھرب سے تجاوز کرنے کے انکشاف پر تشویش کا اظہار کرتے ہوئے کہا ہے کہ 2018-19میں مجموعی قرض اور واجبات میں 35فیصد اضافہ کے ساتھ402کھرب روپے سے تجاوز کرگئے
حکومت اعدادو شمار کے مطابق قرضوں میں 100کھرب 34ارب40کروڑ روپے کا اضافہ ہوا۔انہوں نے کہا کہ حکومتی بڑھتے ہوئے قرضے ملکی معیشت کیلئے نقصان دہ ہیں ان قرضوں کے عوض آئی ایم ایف سمیت بین الاقوامی اداروں کی شرائط پر ملک میں بجلی،گیس،پٹرولیم مصنوعات سمیت ٹیکسوں میں بے تحاشا اضافہ ہورہا ہے جس کے باعثقرضوں کی ادائیگی کیلئے ٹیکسوں میں اضافہ سے مہنگائی میں ہوشربا اضافہ سے صنعتی شعبہ سمیت عوام متاثر ہورہے ہیں۔ ان خیالات کا اظہار انہوں نے سینئر وائس چیئرمین وسیم چاولہ، وائس چیئرمین انجینئر خرم کے ساتھ ٹاؤن شپ انڈسٹریز کے صنعتکاروں کے مختلف وفود سے گفتگو کرتے ہوئے کیا۔ اعظم چوہدری نے کہا کہ بھاری قرضوں کے عوض آئی ایم ایف معاہدے کے تحت روپے کی قدر میں کمی سے، ڈالر کی قیمت میں اضافہ، بجلی، گیس کی قیمتوں میں اضافہ سے صنعتی ترقی متاثر ہورہی ہے اور ملک میں ہوشربا مہنگائی جنم لے رہی ہے۔انہوں نے کہا کہ روپے کی قدر میں کمی سے درآمدی اشیاء پر اثر پڑا، افراط زر 13فیصد سے زائد خدشہ ہے ملکی معاشی شرح نمو 9سال کی کم ترین سطح پر ہے انہوں نے کہاکہ حکومت ملک میں ہوشربا مہنگائی کو کنٹرول کرنے کے اقدامات کرے اور صنعتی شعبہ کیلئے بجلی گیس کی قیمتوں میں کمی کرے تاکہ بڑھتی ہوئی ہوشربا مہنگائی کو کنٹرول کیا جاسکے۔
