لاہور(این این آئی) پیپلز پارٹی پنجاب کے صدر قمر زمان کائرہ نے کہا ہے کہ موجودو حکومت کی نالائقی اور غلط پالیسیوں کی وجہ سے عام آدمی کی زندگی اجیرن ہو گئی ہے، ٹرانسپرنسی انٹر نیشنل کی رپورٹ سے حقیقت واضح ہو گئی ہے،اگر یہ سروے مینیجڈ ہیں تو پہلے کیا تھے،
خان صاحب اب لوگوں کو سوشل میڈیا اور میڈیا سے دور رہنے کا کہہ رہے ہیں،خان صاحب آپ نے پہلے ہی میڈیا کا گلا بند کر دیا ہے۔ مال روڈ پر مہنگائی کے خلاف احتجاج کے دوران قمر زمان کائرہ نے کہا کہ غریب ادمی کو اب آٹا ملنا بھی بند ہو گیا ہے،ہم حکومت کی عوام دشمن پالیسیوں کے خلاف سراپا احتجاج ہیں جن کی وجہ سے عام ادمی کی زندگی اجیرن ہو گئی ہے۔ انہوں نے کہا کہ سید حسن مرتضیٰ کا احتجاج اپنی زات کے لئے نہیں ہے،انہوں نے سابق اسپیکر پنجاب اسمبلی اور صوبائی وزرا ء کی یقین دہانی پر فی الوقت بھوک ہڑتال ختم کی ہے۔انہوں نے کہا کہ خان صاحب اب لوگوں کو سوشل میڈیا اور میڈیا سے دور رہنے کا کہہ رہے ہیں، خان صاحب آپ نے پہلے ہی میڈیا کا گلا بند کر دیا ہے۔انہوں نے کہا کہ ٹرانسپرنسی انٹرنیشنل کی رپورٹ پر حکومتی وزرا ء نے کافی باتیں کی ہیں،خان صاحب بھی انہی سروں کو لیکر باتیں کیا کرتے تھے، اگر اب یہ سروے مینیجڈ ہیں تو پہلے کیا تھے۔ انہوں نے کہا کہ اب تو وزرا ء ایک دوسرے کے خلاف باتیں کر رہے ہیں، اسمبلیوں میں گروپ بن رہے ہیں اور ان کے لوگ کہہ رہے ہیں کہ ہماری پالیسیوں کی وجہ سے حالات خراب ہو رہے ہیں،خیبر پختونخوا کے اراکین اسمبلی اپنے وزیراعلیٰ کے خلاف باتیں کر رہے ہیں۔
