پشاور(این این آئی)خیبر پختونخوا میں نان بائیوں کی ہڑتال دوسرے روز بھی جاری رہی ،بعض علاقوں میں لوگ 60 روپے کی ایک روٹی خریدنے پر مجبور ہوگئے ۔میڈیا رپورٹ کے مطابق خیبر پختونخوا میں آٹے کی قلت کے بعد نان بائیوں نے دوسرے روز بھی روٹی کی قیمت بڑھانے کیلئے ہڑتال جاری رکھی جس کی وجہ سے پشاور اور ہزارہ ڈویژن کے بیشتر تندور بھی بند رہے اور عوام کی مشکلات میں اضافہ ہوگیا ۔

پشاور کے چارسدہ روڈ ، فردوس روڈ اور خیبر بازار سمیت بعض نان بائیوں کے تندور کھلے ہیں تاہم وہاں ایک روٹی 60 روپے میں فروخت کی جاتی رہی ۔نان بائیوں کی نمائندہ تنظیم نے بتایاکہ آٹے کی قیمت میں مسلسل اضافہ ہورہا ہے جس کی وجہ سے حکومت کے مقررہ نرخ پر روٹی کی فروخت ممکن نہیں ،اس لئے سرکاری قیمت میں اضافہ کیا جائے، روٹی کی قیمت میں اضافے تک ہڑتال جاری رہے گی۔